Энхтүвшин.Ө Бямбацогт.С 2019.10.11 | Vip76.mn

Сайжруулсан түлшний талаарх Засгийн газрын мэдээллийг сонслоо

Сайжруулсан түлшний талаарх Засгийн газрын мэдээллийг сонслоо

Улсын Их Хурлын чуулганы өнөөдрийн /2019.10.11/ үдээс хойших нэгдсэн хуралдаанаар УИХ-ын гишүүн С.Бямбацогтын асуулга болох сайжруулсан түлшний талаарх Засгийн газрын мэдээллийг сонсч байна. Асуулгын хариуг Шадар сайд Ө.Энхтүвшин танилцууллаа.

Нийслэлийн 220 мянган өрхтэй бөгөөд нэг өрх жилд дунджаар 4-5 тонн түүхий нүүрс хэрэглэж байсан нь нийслэлийн агаарын бохирдлын 80 гаруй хувийг үүсгэж байсан. Засгийн газраас 2018 онд агаарын бохирдлыг бууруулахын тулд түүхий нүүрс хэрэглэхийг хориглох, агаарын бохирдлыг бууруулах тогтоолуудыг баталж, хэрэгжүүлж байна.

Гэр хорооллын иргэдэд цахилгаан халаагуур байршуулах, байшин сууцны дулаалга чиглэлээр арилжааны банкуудтай хамтран ногоон зээл хөтөлбөрийг хэрэгжүүлж байна. Ингэснээр иргэдэд очих зээлийн хэмжээ 8-9 хувь бөгөөд хүүгийн татааст гурван тэрбум төгрөг олгохоор байна. Нийслэлд ажиллаж байгаа 68 халаалтын зуухыг 2017, 2018 оны төсвийн хөрөнгө оруулалтаар нэгдсэн  төвлөрсөн дулаанд холбох, дэд станцын барилгын ажил хийснээр 139 барилга, байгууламж төвлөрсөн дулаанд холбогдож, түүхий нүүрсний хэрэглээг 52 мянга 300 тонноор бууруулсан.

Амгалан ДЦС-ын хэрэглээг нэмж, 2018-2019 онд жирийн болон нам даралтын 171 зуухыг зогсоож, 24,6 Кватт цахилгаан, 210 нэгжийн барилга, байгууламж төвлөрсөн дулаанд холбосон. Гэр хороололд байрлах 21 сургууль, цэцэрлэгийн зуухыг, цахилгаан холбох ажил хэрэгжиж байна. Эрчим хүчний зохицуулах хорооноос 2018 онд нийслэлийн гэр хорооллын хэрэглэгчдийн 21.00-06.00 цагийн хоорондох хэрэглээг 100 хувь хөнгөлөлттэй үнээр түгээх шийдвэр гаргасан.

Үүний дагуу 2018 онд 11,5 тэрбум төгрөгийн тарифын хөнгөлөлтийг хэрэглэгчдэд үзүүлж байна. 2019 оны арваннэгдүгээр сарын 1-ээс тарифын хөнгөлөлт эхэлнэ. Мөн нийслэлийн нийтийн тээвэрт явж буй 937 орчим автобуснаас 2020 он гэхэд 450 гаруй автобус үйлчилгээнээс хасагдахаар байна. Нийтийн тээврийн хэрэгслээс ялгарах утааг бууруулахын тулд байгалийн хийгээр ажилладаг 70 автобус, автобусанд хөө тортог бууруулдаг шүүлтүүр суулгах ажлын эхлүүлсэн.

Нийт гэр хороололд оршин суугаа өрхийн

  • 32 хувь нь аравдугаар сард
  • 29 хувь нь арваннэгдүгээр сард
  • 21 хувь нь орлогын эх үүсвэртээ тааруулан жижиглэнгээр худалдан авалт хийдэг байна.

Таван толгой түлш ХХК-ийн дөрвөн үйлдвэрийн 8 шугам 24 цагаар тасралтгүй үйл ажиллагаа явуулж 68 мянган түлш худалдаанд гаргаснаас 25 мянган тонн түлшийг борлуулаад байгаа юм байна.

Шадар сайд Ө.Энхтүвшин өнгөрсөн лхагва гарагт болсон Засгийн газрын ээлжит хуралдаанаар гэр хорооллын өрхүүдэд нэг удаа утаа шүүгч төхөөрөмж үнэгүй суурилуулахаар болсон талаар мэдэгдээд энэ ажилд 6 тэрбум гаруй төгрөгийг зарцуулна гэдгийг хэллээ.

Асуулгын хариутай холбоотой УИХ-ын гишүүд асуулт асууж байна.