Ө.Энхтүвшин 2019.10.24 | Eguur.mn

Ө.Энхтүвшин: Э.Оюунболдын бүх давааг хүчингүйд тооцон, түүнд унасан бөхчүүдэд цол нөхөж олгохоор шийдвэрлэлээ

Ө.Энхтүвшин: Э.Оюунболдын бүх давааг хүчингүйд тооцон, түүнд унасан бөхчүүдэд цол нөхөж олгохоор шийдвэрлэлээ

Энэ жил улсын наадамд түрүүлсэн Э.Оюунболд, тав давж, цолоо баталсан Д.Цэрэнтогтох нараас допинг илэрсэн. Үндэсний бөхийн салбар хорооныхон хуралдан дээрх хоёр бөхийн цолыг хурааж, барилдах эрхийг нь хоёр жилээр хасах шийдвэр гаргасан талаар бид өмнө нь мэдээлсэн.

Энэ асуудлаар Үндэсний баяр наадмыг зохион байгуулах хорооныхон өнөөдөр хуралдаж, хэд хэдэн шийдвэр гаргажээ.

Энэ талаар Баяр наадмыг зохион байгуулах хорооны дарга, Шадар сайд Ө.Энхтүвшингээс тодруулахад “Д.Цэрэнтогтох В сорьцоо шинжлүүлсэн нь А-тайгаа таарсан. Харин Э.Оюунболд В сорьцоо шинжлүүлээгүй. Ер нь допингийн шинжилгээний хариу зөрсөн тохиолдол өмнө нь гарч байгаагүй юм билээ.

Баяр наадмыг зохион байгуулах хороо хуралдаад дээрх хоёр бөхийн бүх давааг хүчингүй болгож, тэдэнд унасан бөхчүүдэд цол нөхөж олгохоор болсон. Тэгэхээр А.Мустафад улсын начин, Б.Цэдэнсодномд улсын харцага, Д.Анарт улсын заан, Н.Батсуурьт даян аварга цол, улсын арслан Ц.Содномдоржид чимэг нөхөж олгоно. Мөн Э.Оюунболд, Д.Цэрэнтогтох нарын барилдах эрхийг хоёр жилээр хасахаар шийдвэрлэсэн. Баяр наадмыг зохион байгуулах хорооноос гаргасан эл шийдвэр эцсийнх биш. Бид саналаа Ерөнхийлөгчид өргөн барина. Ерөнхийлөгч хэрхэн шийдвэрлэхээс бүх зүйл шалтгаална” гэв.