Он дуусталх хугацаанд нийслэлд 464 мянган тонн сайжруулсан түлш нийлүүлнэ. Энэ талаар Нийслэлийн Засаг дарга бөгөөд Улаанбаатар хотын захирагч С.Амарсайхан өнөөдөр болсон Улсын Онцгой комиссын хуралдаан дээр танилцуулав.

Хотын захиргаа 2019-2020 оны халаалтын улиралд айл өрхүүдийг 600 мянган тонн сайжруулсан түлшээр хангах юм. Нийслэлд сайжруулсан түлшний хангамжийн 8, дундын 37, борлуулалтын 384 цэг ажиллаж байна.

Сайжруулсан түлшнээс авсан 31 дээжийг дотоодын тав, гадны гурван лабораторид шинжлүүлэхэд хүний эрүүл мэнд, байгаль орчинд ноцтой сөрөг нөлөө үзүүлэх эрсдэлтэй химийн элемент, эрдэс илрээгүй, ахуйн хэрэгцээнд ашиглахад аюулгүй гэж гарчээ.

11 дүгээр сарын Улаанбаатар хотын агаар дахь агаар бохирдуулах бодисын дундаж агууламжийг өмнөх оны мөн үеийн дундаж агууламжтай харьцуулахад PM2.5 тоосонцор 59мкг/м куб-ээр буюу 55 хувиар, PM10 тоосонцор 80мкг/м куб-ээр буюу 38 хувиар бага, хүхэрлэг хий 13мкг/м куб-ээр их, азотын давхар исэл өмнөх жилийн түвшинд байна.