УИХ-ын гишүүн Н.Учрал Хөдөлмөр, нийгмийн хамгааллын сайд С.Чинзоригтой уулзлаа. Уулзалтын үеэр Тэтгэврийн шинэчлэлийг хэрэгжүүлэхтэй холбоотой цаг үеийн асуудлаар санал солилцсон байна.

Н.Учрал гишүүн УИХ-ын даргын захирамжаар байгуулагдсан Төрөөс тэтгэврийн шинэчлэлийн талаар баримтлах бодлогын хэрэгжилтийг шалгаж, цаашид хэрэгжүүлэх арга хэмжээний талаар санал, шийдвэрийн төсөл боловсруулах үүрэг бүхий ажлын хэсгийг ахлан ажиллаж байгаа билээ. Тэрээр өнгөрөгч долоо хоногт УИХ-ын дарга Г.Занданшатар, Сангийн сайд Ч.Хүрэлбаатар нартай уулзаж, тэтгэврийн шинэчлэлийн хүрээнд хувийн тэтгэврийн санг нэвтрүүлж шимтгэл төлсөн иргэн тэтгэврийн хуримтлалаа өвлүүлэх, хуримтлалдаа хүүгээс хүү тооцуулах, амьдралын нэн шаардлагатай үед тодорхой хувийг урьдчилж авах боломжийг бүрдүүлэх талаар санал солилцсон юм. Улмаар хувийн тэтгэврийн сангийн эдийн засагт оруулах маш хүчтэй эерэг нөлөөллийн талаар харилцан зөвлөлдсөн. 

Харин өнөөдөр Хөдөлмөр, нийгмийн хамгааллын сайдтай уулзах үеэр боловсруулж буй хуулийн төслийнхөө хэрэгцээ шаардлага, үзэл баримтлал, онцлог зохицуулалтуудын талаар танилцуулсан байна. С.Чинзориг сайд тэтгэврийн шинэчлэл хийх нь зүйтэй гэдэгтэй санал нэг байгаагаа энэ үеэр илэрхийллээ. Иймд боловсруулж буй хуулийн төсөл, холбогдох материалыг ХНХЯ-ны ажлын хэсэгт хүргүүлж, шинэчлэлийн ажлыг түргэвчлэхээр тохиролцлоо.

Хувийн тэтгэврийн сангийн тухай хуулийг УИХ-д өргөн барих хугацаа улам ойртсоор байна. Удахгүй олон нийтийн хэлэлцүүлэгт тавихаар бэлтгэж байгаа тул иргэд хуулийн төсөлд идэвхтэй санал өгөхийн хүсэж байна. 

Ц.Соёлмаа