Чинзориг.С 2020.04.17 | Zindaa.mn

С.Чинзориг: Иргэн, ААН-ийг нийгмийн даатгалын шимтгэлээс чөлөөлөх журмыг баталлаа

С.Чинзориг: Иргэн, ААН-ийг нийгмийн даатгалын шимтгэлээс чөлөөлөх журмыг баталлаа

Засгийн газар өнөөдөр /2020.04.17/ ээлжит бусаар хуралдлаа. Хуралдаанаас гарсан шийдвэрийг Сангийн сайд Ч.Хүрэлбаатар, Хөдөлмөр нийгмийн хамгааллын сайд С.Чинзориг нар танилцууллаа. 

Энэ үеэр Хөдөлмөр, нийгмийн хамгааллын сайд С.Чинзориг "УИХ-аас цар тахлын үед эдийн засгийг эрчимжүүлэх, орлогыг нэмэх чиглэлээр тогтоол гарсан. Нийгмийн даатгалын шимтгэлээс чөлөөлөх зэрэгтэй холбоотой хуулийг гаргасан. Гурван сарын хугацаатай ажилчдад 200 мянган төгрөг өгөх, нийгмийн даатгалын шимтгэлийг чөлөөлөх журмыг баталлаа. Нэгдүгээрт, төрийн болон орон нутгийн өмчит түүний оролцоотой бусад этгээд, байгууллага хуульд хамрагдана.

Төрийн байгууллага хөнгөлөлт, чөлөөлөлтөд хамрагдахаар боллоо. Өмчийн хэлбэр харгалзахгүйгээр хуульд хамруулна. Өөрөөр хэлбэл, ажилтны нэг, хоёр, гурван сард авсан цалингийн дунджаас хамаарч нийгмийн даатгалын шимтгэлийг төлснөөр тооцож дэвтэр дээр нь бичилт хийнэ. Ажил олгогчийг мөн энэ аргаар тооцож шимтгэлээс чөлөөлнө" гэх мэдээллийг өгөв.

Түүнчлэн "Үйл ажиллагаа нь зогссон, орлого нь 50 хувиас дээш буурсан аж ахуйн нэгжийн ажилчдад 200 мянган төгрөгийн дэмжлэг үзүүлэхээр болсон. Хувиараа хөдөлмөр эрхэлж байгаа иргэдийг чөлөөлөхдөө хөдөлмөрийн хөлсний доод хэмжээгээр тооцож, шимтгэлийг чөлөөлнө. Энэ мэт харилцааг зохицуулсан журам батлагдаж байна. Ирэх долоо хоногоос Татварын ерөнхий газартай холбогдож мэдээллээ солилцоно.

Тус газар нь журамд заасны хүрээнд үйл ажиллагаагаа явуулна. Энэ сардаа багтааж зохион байгуулна. Хүүхдийн мөнгийг олгож эхэлсэн. Хүүхдийн мөнгийг долдугаар сарын 1-ний өдөр хүртэл сарын 30 мянган төгрөгөөр тооцож олгоно. Өөрөөр хэлбэл, 10 мянган төгрөгөөр нэмж байна. Хүүхдийн мөнгийг авч байгаа эцэг, эх хүүхдийнхээ нэр дээр хадгаламж нээж сар бүрийн 20 мянган төгрөг хийнэ гэж гэрээ хийсэн болохоор гэрээний дагуу 20 мянган төгрөг нь дансанд нь орж байгаа юм.

Үүнээс болж ойлголтын зөрүү гараад байна. Харин дансанд нь үлдсэн 10 мянган төгрөг нь орж байна. Хүсэлт гаргасан хүүхэд бүрд олгож байна. Гуравдугаар сард хүсэлт гаргасан хүүхдийн мөнгийг олгоогүй, харин өчигдрөөс орж эхэлж байгаа юм. Гэхдээ өнгөрсөн сарын мөнгийг 20 мянган төгрөгөөр олгож байгаа юм" хэмээн ярилаа.