Сонгуулийн ерөнхий хорооноос өнөөдөр /2020.06.29/ УИХ-ын 2020 оны ээлжит сонгуульд ялалт байгуулсан 76 нэр дэвшигчид түр үнэмлэхийг нь гардуулна.

Ингэснээр УИХ-ын гишүүнээр сонгогдсонд тооцсон шийдвэрийг Монгол Улсын Ерөнхийлөгч Х.Баттулгад өргөн мэдүүлэх юм.

УИХ-ын тухай хуулийн дагуу Анхдугаар чуулганыг ээлжит сонгуулийн санал хураалт явуулсан өдрөөс хойш 30 хоногийн дотор Ерөнхийлөгч зарлигаар товлон зарлаж хуралдуулах учиртай. Ингэхдээ Ерөнхийлөгч олонхи болсон намтай зөвшилцөж,  хугацааг тогтоох юм.

Анхдугаар чуулганыг УИХ-ын гишүүнээр сонгогдсон хамгийн ахмад настай гишүүн даргалах ёстой бөгөөд энэ удаад Баян-Өлгий аймгаас сонгогдсон УИХ-ын гишүүн Х.Баделхан /63 настай/ удирдах нь. 

Өмнөх жишгээс харвал

2012 оны сонгуулийн дараа УИХ-ын  анхдугаар чуулган 7 сарын 6 өдөр хуралдаж байсан бол 2016 онд 7 сарын 1 өдөр хуралдаж байжээ. Энэ удаагийн анхдугаар чуулган энэ 7 хоногт болох хэмээн ойрын эх сурвалжууд хэлж байна. 

АНХДУГААР ЧУУЛГАНААР ХЭЛЭЛЦЭХ АСУУДАЛ:

УИХ-ын тухай хууль:

•  14.3.1. шинээр сонгогдсон гишүүдийн бүрэн эрхийг хүлээн зөвшөөрөх
•  14.3.2. Улсын Их Хурлын дарга, дэд даргыг сонгох
•  14.3.3. Байнгын болон дэд хороодын бүрэлдэхүүнийг баталж Байнгын хорооны дарга нарыг сонгох
•  14.3.4. Ерөнхий сайдыг томилох
•  14.3.5. Засгийн газрын бүтэц, бүрэлдэхүүний тухай хууль хэлэлцэн батлах
•  14.3.6. Засгийн газрын гишүүдийг томилох
•  14.3.7.Улсын Их Хурлын чуулганы хуралдааны дэгийг шинэчлэн батлах эсэх асуудлыг шийдвэрлэх
• 14.4. Анхдугаар чуулганаар зохион байгуулалтын бусад асуудлыг хэлэлцэн шийдвэрлэж болно.
• 14.5.Анхдугаар чуулганаар энэ хуулийн 14.3.7-д заасан асуудлаар санал хураалт явуулж, нийт гишүүний гуравны хоёроос доошгүй нь дэмжсэн бол Улсын Их Хурлын чуулганы хуралдааны дэгийг шинэчлэн батална.