Ц.Сэргэлэн 2020.08.28 | Vip76.mn

Ц.Сэргэлэн: Жижиг дунд бизнес эрхлэгчид Төрөөс гуйхгүйгээр нийгмийн хэрэгцээг хангаж байна

УИХ-ын Аюулгүй байдал, гадаад бодлогын байнгын хорооны өнөөдрийн /2020.08.28/ хуралдаан эхэллээ. Хуралдаанаар Монгол Улс, Олон улсын хөгжлийн ассоциаци хооронд байгуулах “Онцгой байдлын үеийн дэмжлэг болон хөдөлмөр эрхлэлтийн төсөл”-ийн Санхүүжилтийн хэлэлцээрийн төслийг зөвшилцөх асуудлыг хэлэлцлээ.

Уг төсөлтэй холбогдуулан УИХ-ын гишүүд асуулт асууж, санал хэллээ.

УИХ-ын гишүүн Ц.Сэргэлэн:

"Жижиг бизнес эрхлэгчид олон асуудал, бэрхшээлийг ярьдаг. Тэд төрөөс гуйдаггүй, өөрсдийнхөө болон өрөөлийн хэрэгцээг хангаж яваа хүмүүс. Ялангуяа нийгмийн хэрэгцээг тодорхой хэмжээнд хангаж, бор зүрхээрээ зүтгэж яваа хүмүүс гэж би боддог. Тэдэнд л энэ зээл очих ёстой гэж үзэн, дэмжиж байна. Орон нутагт ажил олдохгүй, өөрийн чадлаараа гутлын цех байгуулаад явж байх жишээтэй. Тэдэнд эргэлтийн хөрөнгийн дэмжлэг, зээл өгөхийг хүсдэг. Банкнаас зээл авахаар үндсэн хөрөнгө, барьцаагүй учраас боломжгүй байдаг гэдэг. Тиймээс энэ зээлийн сонгон шалгаруулалт дээр гардан ажиллах хүмүүс шударга ажиллаасай гэж хүсэж байна.

Тэгэхээр сонгон шалгаруулалт явуулахдаа ялангуяа орон нутагт. Хөдөөд ажилгүйдэл ихтэй, үүнийгээ дагаад олон сөрөг үзэгдэл бий болсон. Төвөөс алслагдсан сумдад нөхцөл хүнд байгаа. Өнөөдөр жижиг бизнес эрхлэгч гэдэг маань ганзагын наймаа эрхлэгчид байна. Ковид-ын үед хил хаагдчихсан. Ойр орчимын сумдаасаа бараа таваараа татаж байгаа эдгээр хүмүүстээ л хүрч ажиллаарай."