УИХ-ын гишүүн, Инновац, цахим бодлогын байнгын хорооны дарга Н.Учрал, тус байнгын хорооны гишүүд Х.Ганхуяг, Г.Амартүвшин, Ц.Мөнхцэцэг нар өнөөдөр /2020.09.09/ Шударга өрсөлдөөн хэрэглэгчийн төлөө газрын дарга Б.Бат-Эрдэнэ болон албаны хүмүүстэй уулзаж, Өрсөлдөөний тухай хуулийн шинэчилсэн найруулгын төслийн танилцуулгыг сонслоо.

Өрсөлдөөний тухай хууль нь 1993 онд УИХ-аар Шударга бус өрсөлдөөнийг хориглох тухай хууль нэртэй батлагдаж байжээ. Түүнээс хойш 2 удаа нэмэлт өөрчлөлтийн хэмжээнд өөрчилж байсан бол энэ удаад шинэчилсэн найруулгын төвшинд өөрчлөх ёстой гэж ШӨХТГ болон ажлын хэсэг үзэж байгаа аж.

ИЦББХ-ны дарга, УИХ-ын гишүүн Н.Учрал

Монгол Улсын Үндсэн Хуульд нэмэлт, өөрчлөлт орсонтой холбоотойгоор шинэчлэгдэх гэж байгаа Өрсөлдөөний тухай хуулийн төсөл нь 5 бүлэг, 31 зүйлтэй юм байна. Тус төслийн танилцуулгын дараа УИХ-ын гишүүд асуулт асууж, саналаа хэллээ. УИХ-ын гишүүн Ц.Мөнхцэцэг онлайн худалдаа, аж ахуй нэгжид ногдуулах торгуулийн талаар асуусан бол УИХ-ын гишүүн Х.Ганхуяг, Г.Амартүвшин нар Шударга өрсөлдөөн, хэрэглэгчийн төлөө байгууллагын бүтэц, зохион байгуулалтыг уг хуулиар өөр түвшинд гаргах ёстойг санууллаа. Байнгын хорооны дарга Н.Учрал Өрсөлдөөний тухай хуулийн шинэчилсэн найруулгыг онцгой анхаарч, нухацтай хандахыг анхааруулаад, дахин ажил хэрэгч уулзалтыг хийх хэрэгтэй гэлээ.

ШӨХТГ-аас Өрсөлдөөний тухай хуулийн шинэчилсэн найруулгын төсөлд оруулах санал сэдвээр жижиг дунд үйлдвэр эрхлэгчдийн саналыг сонсож, хэлэлцүүлэг зохион байгуулахаар болоод байна.