УИХ-ын Аюулгүй байдал, гадаад бодлогын байнгын хороо хуралдлаа. хуралдаанаар Улсын Их Хурлын гишүүн Х.Булгантуяа, Ж.Сүхбаатар нараас 2020.12.22-ны өдөр өргөн мэдүүлсэн "Коронавируст халдвар /КОВИД-19/-ын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүдийг хэлэлцлээ. 

Төсөлтэй холбогдуулан УИХ-ын гишүүд асуулт асууж, санал хэллээ. 

УИХ-ын гишүүн Ц.Сэргэлэн:

"Цар тахлын үед төрөөс үзүүлж буй дэмжлэг, авч буй арга хэмжээний гадуур үлдээд байгаа нийгмийн бүлэг байна гэж харагдаад байгаа юм. Түүнээс гадна маш олон иргэдээс энэ талаар асуудал тавьж байна.

Нийгэм эдийн засгийн хэвийн нөхцөлд цар тахал бий болоогүй үед нийгэмд тодорхой хэмжээний үүрэг гүйцэтгээд төрд ирэх ачааг өөрсдийн нуруунд үүрээд явдаг нийгмийн бүлэг хэсэг бий. Тэд бол бичил бизнес эрхлэгчид буюу жижиг худалдаачид. Өнөөдөр бүх хилийн боомт хаагдсан. Бүх худалдааны төвүүд саяханаас ажиллаж байна. Энэ жижиг худалдаа хийгчдийн амьдралын эх үүсвэр өдрийн орлого нь байсан. Энэ тасалдаж байхгүй болсон. Эдгээр хүмүүс эдийн засгийн хэвийн нөхцөлд төрөөс юу ч гуйдаггүй, халамж, дэмжлэг хүсдэггүй өөрсдийнхөө боломжоор амьдралаа авч явдаг. Түүнээс гадна хажуудаа ганц нэг хүнийг ажлын байраар хангадаг. Өдрийн орлоготой байлгадаг олон мянган хүмүүс энэ нийгэмд амьдарч байна. Би эдгээр хүмүүсийг төрийн өмнө гавьяатай хүмүүс гэж ойлгодог.

Хэн нэгнээс үл шалтгаалах гэнэтийн гамшгаас болж тэг зогсолт хийсэн хүмүүс бол жижиг бизнес эрхлэгчид юм. Тиймээс энэ хүмүүс рүү чиглэсэн төрийн дэмжлэг өнөөдөр хэрэгтэй байна. Цар тахал дуусч, нийгэм хэвийн амьдралд орно. Эдгээр хүмүүс нийгэмдээ өөрийн дэмжлэг туслалцаагаа үзүүлээд л явна. Энэ хүнд үед эдгээр хүмүүстээ туслая гэсэн санал хэлээд байгаа юм.

Өнөөдрийн бидний хэлэлцэж байгаа төслүүд бүгд л нэг санаатай. Цар тахлыг даван туулахад ард иргэдээ дэмжих зорилготой. Энэ дунд жижиг бизнес эрхлэгчид үлдчих вий гэсэндээ тусад нь би хэлээд байгаа юм. Зээлийн хүүг нь бууруулаад өгчихье. Тэдний эргэлтийн хөрөнгийн зээлийн хүүг бууруулах болж өгвөл тэглэх, төрөөс мөнгөн дэмжлэг үзүүлэх боломж байна уу? Үүнийг ажлын хэсэгтэй хамтран ажиллья. "

Сэтгүүлч

Редактор Ц.Соёлмаа soko@vip76.mn