2021.05.13

С.Чинзориг: Улс төрчдийн шийдвэр Нийгмийн даатгалын сан алдагдалд ороход хүргэнэ

УИХ-ын нэгдсэн чуулганы өнөөдрийн /2021.05.13/ хуралдаан үргэлжилж байна. Нийгмийн даатгалын тухай хуульд өөрчлөлт оруулах тухай хуулийн төслийн хэлэлцүүлэгт гишүүд асуулт асууж, хариулт авч байна.

УИХ-ын гишүүн С.Чинзориг:  

"Цар тахлын хүнд үед аж ахуйн нэгжүүд болон ажилчдыг орлоготой болгох, ажлын байрыг хадгалахад нийгмийн даатгалын сан багагүй хувь нэмэр оруулж байгаа юм. Өнгөрсөн жилийн 4 дүгээр сарын нэгнээс эхлэн У.Хүрэлсүхийн засгийн газар Нийгмийн даатгалын шимтгэлийг 6 сарын хугацаатай 100% чөлөөлөлтийг аж ахуйн нэгж болон иргэдэд үзүүлж, нийт 690 орчим тэрбум төгрөгийн чөлөөлөлтийг хийж өгсөн байдаг.

10 дугаар сарын нэгнээс Тэтгэврийн шимтгэлийг 3,5%-аар, энэ оны нэгнээс эхлүүлэн тус шимтгэлийг 2%-аар бууруулж нийтдээ 40 орчим тэрбум төгрөгийн хөнгөлөлт, чөлөөлөлт очсон билээ.

Түүнчлэн У.Хүрэлсүхийн засгийн газар Нийгмийн даатгалын шимтгэл төлж буй хувийн хэвшлийн аж ахуйн нэгжүүдийн ажлын байрыг хадгалах, орлогыг нэмэгдүүлэх хүрээнд 200 тэрбум төгрөгийн дэмжлэгийг тус сангаас үзүүлсэн юм. Тиймээс энэ хүнд цаг үед ажил олгогч, ажилчдыг дэмжиж байгаа томоохон сан бол Нийгмийн даатгалын сан гэж харж байна. Цаашид Нийгмийн даатгалын санг боловсронгуй болгох, хууль эрх зүйн орчныг сайжруулах гэх мэт асуудлууд бий.

Гэхдээ Улс төрчдийн мэргэжлийн бус байдлаас үүдэн Нийгмийн даатгалын сан алдагдалд орох нөхцөл байна. Тухайлбал АН 1990-1995 онд Засаг барьж байхад ажил эрхэлдэггүй иргэдийг Улсад ажилласан болгож, нийгмийн даатгалын шимтгэл төлснөөр тооцсон байдаг. Үүнээс үүдэн 700 тэрбум төгрөгийн алдагдал орсон юм.

Тиймээс Улс төрчдийн шийдвэрээс болж тус сан хүндэрч байна гэдгийг бид ойлгох хэрэгтэй байгаа юм.

Цаашид Төсвийн тухай хуультай зөрчилдөхгүйгээр асуудлыг шийдэх, хэлэлцэх шаардлагатай байна. Нийгмийн даатгалын хууль эрх зүйн орчныг боловсруулахдаа улс төржихгүйгээр мэргэжлийн чиг баримжаатай хандаж шинчлэлтийг хийх нь зөв юм. Иймд тус хуулийг хэлэлцэх асуудлыг дэмжиж байна.”