УИХ-ын Хууль зүйн байнгын хорооны /2021,10,06/-ны хуралдаан боллоо. Хуралдаанаар Хууль зүйн байнгын хорооны 2020 оны 12 дугаар сарын 24-ний өдрийн 09 дүгээр тогтоолоор байгуулагдсан Монгол Улс олон талт олон улсын гэрээнд нэгдэн орсноор хүлээсэн үүргийн хэрэгжилтийн тайланг холбогдох байгууллагад хүргүүлэх, тайлантай холбогдуулан олон улсын байгууллагаас ирүүлсэн зөвлөмжийн дагуу хэрэгжүүлж байгаа ажлын явц байдалтай танилцах, санал дүгнэлт боловсруулах үүрэг бүхий Ажлын хэсгийн явцын танилцуулгыг сонслоо.

УИХ-ын гишүүн Ц.Мөнхцэцэг:

Манай улс бусад орнуудтай хийх эрх зүйн харилцан туслалцаа үзүүлэх гэрээний тухай сэдэв хэлмээр байна.

Одоогоор 19 улстай эрх зүйн харилцан туслалцаа үзүүлэх гэрээ хийсэн байгаа. Гэтэл сүүлийн 20 гаруй жилийн турш монголчуудын хилийн чанадад ажиллах, суралцах, урт хугацаанд амьдрах асуудал нэмэгдсэн. Үүнийг дагаад тэдний эрх ашиг ихээр зөрчигдөх болсон. Жишээлбэл, Малайз улсад амиа алдсан талийгаач Ш.Алтантуяагийн хэргийг дурдаж болно. Тухайн улстай эрх зүйн харилцан туслалцаа үзүүлэх гэрээгүй учир энэ асуудлыг шийдэж чадахгүй өдий хүрчээ.

Тийм учраас монголчууд ихээр зорчиж, суурьшдаг улс оронтой эрх зүйн харилцан туслалцаа үзүүлэх гэрээ байгуулах хэрэгтэй. Өөрөөр хэлбэл гэрээ байгуулах улсаа өргөжүүлэх нь чухал гэсэн үг. Цаашид даяарчлагдаж буй нийгэмд улс хоорондын гэхээс илүүтэй олон улсын шилжилт хөдөлгөөн, хүмүүсийн эрх ашгийг голчлон анхаарах нь зүйтэй. Хууль зүйн байнгын хороонд Гадаадад монгол иргэн зорчих тухай хуулийн төсөлд энэ асуудлыг тусгамаар байна.