УИХ-ын Хууль зүйн байнгын хорооны өнөөдрийн /2022.01.18/ хуралдаанаар “Тогтоолын хавсралтад нэмэлт, өөрчлөлт оруулах тухай” болон “Цалин, нэмэгдлийн хэмжээ тогтоох тухай” Улсын Их Хурлын тогтоолын төслүүд /Шүүхийн ерөнхий зөвлөлийн болон Шүүхийн сахилгын хорооны шүүгч бус гишүүний цалин хөлс, нэмэгдлийн тухай/ хэлэлцлээ.

Хэлэлцэж буй асуудалтай холбогдуулан УИХ-ын гишүүд асуулт асууж, санал хэллээ.

УИХ-ын гишүүн Л.Мөнхбаатар:

Сахилгын хороо, Шүүхийн ерөнхий зөвлөлийн үйл ажиллагааг хэвийн явуулах нөхцөл боломжийг УИХ бүрдүүлэх ёстой. Энэ үүднээс хэлэлцэж буй хоёр асуудлыг шуурхай шийдээд явах нь зүйтэй. Яагаад гэвэл байгууллага байгуулагдаад багагүй хугацаа өнгөрлөө. Энэ хугацаанд шүүгч гишүүд цалингаа аваад явж байсан бол шүүгч бус гишүүд нь цалингаа өнөөдрийг хүртэл аваагүй байх жишээтэй.

Төслийг анх оруулж ирэхдээ итгэлцүүрээр цалинг тооцдог аргачлалаар явна гэж ярьсан. УИХ дээр хувь хүний цалинг мөнгөн дүнгээр ярихгүй гэдэг зарчимтай холбоотой. Итгэлцүүрээр тооцож, цалин урамшууллыг тогтоох нь хамгийн зөв алхам юм.