УИХ-ын Эдийн засгийн байнгын хорооны өнөөдрийн хуралдаанаар "Монгол Улс, Азийн хөгжлийн банк хоорондын Зээлийн хэлэлцээрүүд /Уур амьсгалын өөрчлөлтөд тэсвэртэй, тогтвортой мал аж ахуйг хөгжүүлэх төсөл/-ийг хэлэлцлээ.

Хэлэлцэж буй асуудалтай холбогдуулан УИХ-ын гишүүд асуулт асууж, санал хэллээ.

УИХ-ын гишүүн С.Чинзориг:

Хуулийн төслийг зарчмын хувьд дэмжинэ. Манай улс мал аж ахуйн чиглэлээр төрөөс баримтлах бодлогыг өөрчлөх цаг болсон. Малчид уламжлалт нүүдлийн мал аж ахуйгаар амьдрах боломжгүй болчихлоо. Малчид байгалийн цаг агаараас шууд хамааралтай амьдардаг учраас цаг уурын өөрчлөлтөд үүрээ эвдүүлсэн шоргоолж шиг байдаг. Өвөрхангай аймгийн хувьд сүүлийн 3 жил 1200-1300 малчин өрх отор нүүдэл хийж, зутруухан өвөлжсөн.

Нийт бэлчээрийн 70 хувь нь цөлжилтөд өрсөн гэх судалгаа гарсан. Энэхүү төслийг зайлшгүй хэрэгжүүлэх шаардлагатай дараагийн томоохон шалтгаан бол бэлчээрийн доройтол байна. Тиймээс бэлчээрээ хамгаалах, менежмент хийх зайлшгүй шаардлагатай байна. Түүнчлэн бид малын удмын сангийн асуудлыг олон жил асуудлын гадна орхигдуулж ирсэн. Үүнээс болж малаас хүнд халдварладаг халдварт өвчин маш их нэмэгдсэн. Дээрх шалтгаануудаас үүдэн төслийг зайлшгүй хэрэгжүүлэх шаардлагатай гэж үзэж байна.

Төсөлд 14 мянган малчдын хашаа хороог төслийн мөнгөөр тохижуулна гэдэг нь ямар учиртай вэ, Үүнийгээ эргэж харах хэрэгтэй. Хэр их хэмжээний төсөв санхүү зарцуулах талаар мэдээлэл өгнө үү?

Үүний оронд малын удмын санг сайжруулах, менежментийг дэмжих чиглэлээр тухайн төсвийг шилжүүлэх боломж, гарц гаргалгаа байгаа юм уу?

Түүний асуултад Ажлын хэсгийн төлөөлөл хариуллаа.