УИХ-ын /2022.04.01/-ний өдрийн хуралдаанаар УИХ-ын гишүүн Х.Булгантуяа сургууль, цэцэрлэгийн барилга барих материалын чанар, стандарттай холбоотой хуулийн талаар нээлттэй сонсгол хийх талаар өсвөрийн парламентын бүлэглэлийн хүүхдүүдээс санал ирүүлснийг уламжиллаа.

Хүн амьдралынхаа 90%-ийг дотор орчинд өнгөрүүлдэг. Ялангуяа хүүхдүүд сургууль, цэцэрлэгтээ өдрийн 5-10 цагийг өнгөрөөж байна. Улаанбаатар хотод цэцэрлэг, сургууль, эмнэлэгийн ачаалал их байгаа тул нэг анги танхимд суралцаж байгаа, эмнэлэгийн өрөөнд хэвтэн эмчлүүлж байгаа хүүхдүүдийн тоо норм, стандартаас 2-4 дахин их байгаа. Нийгмийн эрүүл мэндийн үндэсний төв, “Ногоон титэм” ХХК хамтран 2019 онд Улаанбаатар хотын албан байгууллага, цэцэрлэг, сургууль, айл өрхүүд гээд 75 нэгжийн 265 сорьц цуглуулан, дээжид дэгдэмхий органик нэгдлүүдийн хэмжилтийг хийж үзсэн. Үүнээс авч үзэхэд Дэлхийн эрүүл мэндийн байгууллага, Хөдөлмөр аюулгүй байдал, Эрүүл мэндийн үндэсний хүрээлэнгийн зөвлөмжөөс үзэхэд зарим дэгдэмхий бодисууд хэмжээнээсээ давсан үзүүлэлттэй байна. Эдгээр хорт нэгдлийн гол эх үүсвэр нь дотор орчинд ашиглаж байгаа барилгын материалууд болох будаг, өрөө тусгаарлалтын хана, шил, хивс хивсэнцэр гэх мэтээс шууд хамааралтай.

Ковид-19 цар тахал эхлэхээс өмнө 2020 он гэхэд манай улс 599 сая ам.долларын барилгын материал импортолсон. Үүний 99% нь хилийн хяналтад хамрагдахгүйгээр орж ирж байна. Чанар стандарт муу барилгын материалаас ялгарч буй ууршимтгай бодис нь сульдах, амархан ядрах, толгой өвдөж дүүрэх, нүд, хамар, ам загатнах зэрэг сөрөг нөлөөтэй. Цаашлаад багтраа, амьсгал, зүрх судасны өвчнөөр өвчлөх, хавдар үүсгэх эрсдэлтэй. Хорт хавдрын өсөлт жилээс жилд нэмэгдэж буй энэ цаг үед хүүхдүүдийн зүгээс агаарын бохирдол бол чимээгүй цар тахал учраас сургууль, цэцэрлэг, эмнэлэг, дотуур байр зэрэг барилга, байгууламжид ашиглаж буй барилгын материалуудыг сайжруулах, агаар орчны сэлгэлтийг сайжруулах ажлыг хийж өгөхийг хүссэн.

Эрүүл мэндийн тухай хууль, Барилгын тухай хууль гээд хууль эрх зүйн орчин сайн бүрдсэн ч хэрэгжилт маш муу байна. Тиймээс энэ асуудлаар Өсвөрийн парламентийн 90 хүүхэд өвлийн амралтаараа хэлэлцүүлэг хийж, УИХ-ын ах, эгч нараасаа, Засгийн газрын гишүүдээс, иргэд олон нийтээс энэ асуудлыг анхаарлын төвд авахыг хүсч байна.