2022.04.22

С.Чинзориг: Нийгмийн даатгалын шимтгэлийн буцаан олголтыг зөв гэж харахгүй байна

УИХ-ын чуулганы өнөөдрийн \2022.04.22\ нэгдсэн хуралдаанаар Монгол Улсын 2022 оны төсвийн тухай хуульд өөрчлөлт оруулах тухай хуулийн төслүүдтэй хамт өргөн мэдүүлсэн 10 хууль, 4 тогтоолын төслүүдийг хэлэлцлээ.

УИХ-ын гишүүн С.Чинзориг:

Хэмнэлтийн тухай хуульд Шадар сайд нэг ижил зарчим баримталж болоогүй юм уу? Хууль хяналтын байгууллага, УИХ-ын харьяанд үйл ажиллагаа явуулж байгаагаас бусад байгууллага нь дэд дарга, орлогчгүй байна гэж заажээ. Үүнийг бол ялгаатай хандаж байна гэж харлаа.

УИХ-ын албан тушаалын доод хэмжээг тогтоодоггүй. Гэтэл хуулийн төслийн 11.2-т ингээд оруулчихсан байна. Гэхдээ хуульд ийм зүйл заалт байдаггүй. Та бүхэн үүнийг хэрхэн томъёолсон бэ?

Батлагдсан төсөл арга хэмжээний худалдан авах ажиллагааг жил бүрийн гуравдугаар сарын 31-нд багтаан бүрэн дуусгана гэсэн байна. Хугацаанд нь амжих уу?

Засаг захиргааны хамгийн бага нэгж болох багийг дэмжихгүй бол болохгүй. Үүнийг дахин харах хэрэгтэй.

Цэцэрлэгийн хүртээмжийг нэмэгдүүлэхийг дэмжиж байгаа. Хөдөөний хүүхдүүдийг цэцэрлэгт хэрхэн хамрагдуулах вэ? Хотод хүүхдээ цэцэрлэгт хамруулж чадахгүй байгаа бол хувийн цэцэрлэгт хувьсах зардлыг 2 дахин нэмэгдүүлж олгох юм байна. Хамрагдаж чадахгүй бол эцэг эхэд нь хувьсах зардлыг олгох гэнэ. Энэ чинь тэгээд цэцэрлэгийн үйлчилгээ биш халамжийн үйлчилгээ болох юм биш үү?

Нийгмийн даатгалын шимтгэлийн буцаан олголтыг зөв гэж харахгүй байна. Хэрвээ үүнийг буцаан олгох бол ажилтанд нь биш ажил олгогчийг нь дэмжих нь чухал. Урт хугацаанд ажлын байраа хадгалах нь чухал.

Засгийн газрын бүтцэд өөрчлөлт оруулаад гадаадын хөрөнгө оруулалт, гадаад худалдааны агентлаг байгуулахыг байнгын хороо дэмжээгүй байна. Энэ нь хэр оновчтой юм бэ?

Түүний асуултад БШУ-ны сайд Л.Энх-Амгалан хариуллаа.