УИХ-аас Монгол Улсын Үндсэн хуульд нэмэлт, өөрчлөлт оруулах эсэх асуудлаар олон нийтийн санаа бодлыг тандан судлах ажлыг энэ сарын 18-26-нд зохион байгуулахаар шийдвэрлэсний дагуу УИХ-ын гишүүн С.Чинзориг Д.Тогтохсүрэн, Г.Ганболд нар энэ сарын 19-нд Арвайхээрт ахмадуудтай уулзаж санаа бодлыг нь сонслоо.

Уулзалтанд Өвөрхангай аймгаас АИХ-ын депутатаар сонгогдон шинэ Үндсэн хуулийг батлалцсан ахмадуудаас гадна орон нутагт төрийн захиргаа, төрийн үйлчилгээний байгууллагад олон жил ажилласан хүмүүсийг урьж оролцуулсан юм. Манай аймгаас шинэ Үндсэн хуулийг батлахад 20 гаруй хүн оролцсоны 13 нь өдгөө энх тунх амьдарч буй бөгөөд тэдний 6 нь нутаг орондоо байдгаас энэ уулзалтанд Дашпунцаг, Шоовдор, Төмөр-Очир гуай 3 ирсэн байлаа.

Шинэ Үндсэн хуулийг баталснаас хойш 2000, 2019 онд нэмэлт, өөрчлөлт хийсэн бөгөөд энэ үеэр олон нийтийн санаа бодлыг сонсохдоо Зөвлөлдөх санал асуулга явуулж, хэлэлцүүлэг зохион байгуулж ард иргэдийн олонхийн дэмжлэг авсан асуудлуудаа тусгасан боловч хуулийн нэмэлт, өөрчлөлт хэрэгжих явцад зарим асуудлыг дутуу тусгасан, гүйцэд шийдээгүй, дахин сайжруулах шаардлагатай гэсэн асуудлууд гарч ирсэн.

Тиймээс иргэд, улс төрийн намууд, судлаач, эрдэмтдээс ирүүлсэн саналуудыг нэгтгэн судлаад Үндсэн хуулийг өөрчлөх шаардлагатай эсэх болон өөрчлөх нь зөв хэмээн үзэж буй асуудлуудаар ард иргэдийн саналыг сонсох хэлэлцүүлгийг олон нийтийн дунд зохион байгуулж, гарсан саналуудыг нэгтгэж асуудлыг шийдэхээр болсон. Тиймээс ахмадуудтай өөрчлөх нь зүйтэй хэмээсэн санал нэг бүрээр ярилцаж, саналыг нь сонссон юм.

Уулзалтад ирсэн ахмадуудаас 15 хүн Үндсэн хуулийн өөрчлөлтийг хийх нь зөв эсэх болон өөрчлөх шаардлагатай гэсэн асуудлууд дээр санал хэлж, байр сууриа илэрхийлсэн. Тухайлбал, сонгуулийн тогтолцоо, парламентын гишүүдийн тоог нэмэх, давхар дээл, төрийн сүлд, шат шатны Засаг дарга нарыг сонгох болон томилох зэрэг тодорхой асуудлууд дээр тодорхой саналууд хэлсэн. Ахмадуудынхаа хэлсэн санал нэг бүрийг Ажлын хэсэгт хүргэж, шийдвэр гаргахад тусгуулах нь гишүүдийн үүрэг билээ.

Үндсэн хуульд нэмэлт, өөрчлөлт оруулах эсэх асуудлаар ахмадуудтай санал солилцлоо