Тус өргөтгөсөн хурлаар МҮЭ-ийн холбооны ерөнхийлөгч С.Эрдэнэбат "МҮЭ-ийн холбооны үйл ажиллагаа, цаг үеийн зорилтын тухай" мэдээлэл хийж, МҮЭ-ийн холбооны Хяналтын хорооны дарга Б.Энхжаргал "Хяналтын хорооны мэдээлэл"-ийг танилцууллаа.

МҮЭ-ийн холбооны ерөнхийлөгч С.Эрдэнэбат "Монгол Улсын эдийн засаг 2022 оны эхний улирлын байдлаар -3,3 хувьтай, 2022 оны тавдугаар сард инфляцын түвшин 16,2 хувь байгаа нь 2021 оны мөн үеэс 9,5 хувиар өссөн, ажилгүйдэл ядуурал улам гүнзгийрсэн, ажлын байрны нөхцөл, аюулгүй байдлын баталгаа алдагдлаа.

Иймээс иргэд, хөдөлмөрчдийн цалин орлого, нийгмийн хамгааллыг сайжруулах, ажлын байрыг нэмэгдүүлэх, ажлын байрны хөдөлмөрийн аюулгүй байдал, эрүүл ахуйн асуудал, үйлдвэрлэлийн осолд онцгой анхаарал хандуулах зайлшгүй шаардлага тулгарч байна.

 МҮЭ-ийн холбооны энэхүү өргөтгөсөн хурлаас улс орны нийгэм, эдийн засгийн байдлыг дүгнэж иргэдийн цалин орлогыг нэмэгдүүлэх, өргөн хэрэглээний бараа бүтээгдэхүүний үнийг бууруулах, нийгмийн хамгаалал, эрүүл, аюулгүй орчин нөхцөлийг сайжруулах чиглэлээр Төр засаг, нийгмийн түншлэгч талуудад санал хүргүүлнэ.

МҮЭ-ийн холбоо 2022 оны эхний хагас жилийн байдлаар таван удаагийн жагсаал цуглааныг орон даяар амжилттай зохион байгуулж УИХ, Засгийн газар, МАОЭНХ зэрэг холбогдох газруудад хүргүүлж шийдвэрлүүлэхээр ажиллаж байна.

Хөдөлмөрийн хөлсний доод хэмжээг өнгөрөгч тавдугаар сарын 6-ны өдөр 550.000 төгрөг болгон шинэчлэн баталлаа. Энэхүү хөдөлмөрийн хөлсний доод хэмжээг 2023 оны нэгдүгээр сарын 1-ний өдрөөс мөрдөж эхлэх ба 2023 оны эхний хагас жилд 2024 оноос эхлэн мөрдөгдөх цалингийн доод хэмжээг шинэчлэн тогтоохоор түншлэгч талуудтай тохиролцоод байна. МҮЭ-ийн холбооноос Засгийн газар, Улсын их хуралд удаа дараа шаардлага хүргүүлж, жагсаал цуглаан хийж тэмцсэний үр дүнд ТҮ1-3 ангилал зэрэглэлийн ажилчдын цалинг ТҮ-5 ангилал зэргээр цалинжуулах Засгийн газар 192 дугаар тогтоол гаргасан. МҮЭ-ийн холбоо энэхүү тогтоолын хэрэгжилтийг хангуулан ажиллах талаар Монгол Улсын засгийн газрын хэрэг эрхлэх газарт санал хүргүүлэн ажиллалаа” хэмээн мэдээлэлдээ дурьдав.

Энэ удаагийн өргөтгөсөн хурлаар гишүүд МҮЭ-ийн холбооны дүрэмд нэмэлт, өөрчлөлт оруулж батлах асуудлыг хэлэлцэх юм.