БШУ-ны сайд Л.Энх-Амгалан дэд сайд Г.Ганбаяр, УИХ-ын гишүүн Б.Саранчимэг, Х.Булгантуяа, Э.Бат-Амгалан болон холбогдох албаны хүмүүс Баянзүрх дүүрэгт ажиллалаа.

Энэ үеэр Боловсролын хүртээмжийг нэмэгдүүлэх үүднээс дүүрэг, орон нутгаас хийж хэрэгжүүлж байгаа ажлын талаарх мэдээллийг танилцуулсан юм.

Энэ жил 39963 хүүхэд цэцэрлэгт хамрагдана гэсэн мэдээллийг хороодоос ирүүлсэн. Үүнээс 14623 хүүхдийн асуудал хөндөгдөж байгаа бөгөөд эдгээр хүүхдүүдийг цэцэрлэгт хамруулахын тулд Баянзүрх дүүргээс тодорхой ажлуудыг зохион байгуулж байна.

Тухайлбал хувийн цэцэрлэгийн хувьсах зардлыг нэмэгдүүлэх, бүлэг нэмэх, байгууллагын дэргэд цэцэрлэг байгуулах, гэр цэцэрлэг шинээр байгуулах, түрээсийн байр ашиглахаар төлөвлөн ажиллаж байна. Дээрх ажлуудыг зохион байгуулахад зарим нэг хүндрэл гарч байгааг салбарын сайдад танилцуулав. Боловсролын салбарт тулгамдсан эдгээр асуудлуудыг шийдвэрлэж ажиллана гэдгийг тэрээр хэллээ.

Баянзүрх дүүрэгт жилд дунджаар ерөнхий боловсролын сургууль, цэцэрлэгт хамрагдах 9880 хүүхэд шилжин ирдэг. Мөн шинээр баригдсан орон сууцны барилгыг сургууль, цэцэрлэгийн барилгатай харьцуулахад бага байдаг. Дээрх байдлаас шалтгаалж сургуулиуд гурван ээлжээр хичээллэх, цэцэрлэгийн хүртээмжгүй байдал бий болж байна. Боловсролын хүртээмжийг нэмэгдүүлэх, бүх хүүхдийг цэцэрлэгт хамруулах үүднээс түрээсийн байр ашиглах, цомцог гэр барих, бүлэг нэмэх зэрэг тодорхой ажлыг зохион байгуулж байгаа ч асуудлыг бүрэн шийдэхгүй.

Сургуулийн хувьд 11 сургууль гурван ээлжээр хичээллэх эрсдэл үүсээд байна. Тиймээс 2023-2024 оны төсөвт зайлшгүй суулгаж 8 сургууль, 8 цэцэрлэг барих хороодыг танилцууллаа.

Уг асуудлыг салбарын сайд дэмжиж дүүргээс сонгогдсон УИХ-ын гишүүд, НИТХ-ын төлөөлөгч, дүүргийн удирдлагуудтай хамтран хэрэгжүүлж, боловсролын салбарт тулгамдаж буй асуудлыг шийдвэрлэж ажиллана гэв.

БЗД-т 2024 он гэхэд 8 цэцэрлэг, сургууль шинээр бий болж байж хүртээмжний асуудал шийдэгдэнэ

БЗД-т 2024 он гэхэд 8 цэцэрлэг, сургууль шинээр бий болж байж хүртээмжний асуудал шийдэгдэнэ