Сүүлийн жилүүдэд улсын баяр наадамд түрүүлсэн, сайн барилдаж цол, чимэг авсан бөх допинг хэрэглэсэн нь шинжилгээгээр тогтоогдож, цол, чимгээ хураалгах, маргалдах, тохиолдол ихээхэн гарсаар байна.

Мөн зарим бөх, уяач олон түмний бухимдал, дургүйцлийг төрүүлсэн ёс зүйгүй үйлдэл гаргадаг, өв соёлыг үгүйсгэдэг, эв нэгдлийг алдагдуулахад чиглэсэн үйл ажиллагаа явуулж байгаа учраас уг үйлдлийг таслан зогсоох шаардлагын үүднээс Үндэсний их баяр наадмын тухай хуулийн шинэчилсэн найруулгыг Улсын Их Хурал баталлаа.

Үндэсний их баяр наадмын тухай хуульд өөрчлөлт орсноор:

1. Хуульд заасан этгээд допингийн шинжилгээнд орохоос татгалзсан, зайлсхийсэн бол допинг хэрэглэсэнд тооцно

2. Зэргэлдээ сумын баяр наадмыг нэгтгэн зохион байгуулна

3. Хурдан морины сэрвээний өндрийг стандартаар тогтооно

4. Үндэсний их баяр наадамд шагайн харвааг оруулж, зохион явуулах дүрмийг батлахаар боллоо.

Монгол Улсын Их Хурлын гишүүн Ж.Батжаргал

Үндэсний Их Баяр наадам бол энэ үндэстний дархлаа, эв нэгдлээ хамгаалсан түмний цэнгэл. Допингийн байгууллагынхаа статусыг тодорхой болгох хэрэгтэй. Энэ байгууллагын үйл ажиллагаанд тавьдаг хяналтыг тодорхой болгомоор байна. Энэ хуульд холбогдох дүрэм, журмыг сайн анхаарах ёстой.