"Эрдэнэс Таван толгой" ХК-ийн Гүйцэтгэх захирал Б.Ганхуягаас тодруулга авлаа.

-Өчигдөр Засгийн газрын хуралдаанаар ЭТТ компани дээр онц дэглэм тогтоож Засгийн газрын бүрэн эрхт төлөөлөгчийг томилсон гол шалтгаан юу байв?

-Сүүлийн үед Эдийн засаг хөгжлийн сайд Ч.Хүрэлбаатарын Засгийн газар, ҮАБЗ, бусад газруудад танилцуулсан мэдээлэл нь илт гүтгэсэн тоон мэдээллүүд байсан. Харин Эрдэнэс Таван толгойгоос бодит мэдээллийг давхар өгч эхэлсэн. Ийм байдлаар хоёр тал тус тусдаа мэдээлэл өгч, огт ойлголцохгүй байдал үүсч, аль алиныгаа хүлээн зөвшөөрөөгүй. Ийм байдалд нэгэнт хүрсэн тул шийдэл хайж эхэлсэн. Миний бие өөрөө Засгийн газрын хэрэг эрхлэх газар болон Үндэсний аудитын газарт, ҮАБЗ-д хүсэлт гаргаж тоон мэдээллийг тогтоож өгөхийг хүссэн бичиг хүргүүлсэн. Энэ саналын дагуу миний төсөөлснөөс сайн шийдвэр гарч, талууд маргаангүйгээр нэг ойлголттой болох нөхцөл үүслээ гэж аль аль нь үзсэн.

-ЗГХЭГ-ын дарга Д.Амарбаясгалан оны сүүл гэхэд төлбөрийн тэнцэл болох 500 сая ам.долларыг Эрдэнэс Таван толгой дансандаа төвлөрүүлэх боломжгүй болсон гэж мэдээлэлдээ дурдсан. Энэ үнэн үү?

-Бүрэн боломжтой. Өнөөдрийн уртын тээвэрт 600 машин явж байгаа. Үүний 60 хувь буюу 360 нь Эрдэнэс Таван толгой ХК-ийн тээвэр. Яг энэ тоогоороо оны эцэст хүрвэл 340 орчим сая ам.доллар бүрдүүлнэ. Харин нэмэгдүүлбэл 500 чөлөөтэй хүрнэ. Засгийн газрын тогтоол гарсан аравдугаар сарын 5-ны өдрөөс хойш Эрдэнэс Таван толгой 80 сая ам.доллар бүрдүүлж өгсөн.

-Яг өнөөдөр Эрдэнэс Таван толгой компанийн санхүүгийн нөхцөл байдал ямар түвшинд байгааг та л хэлнэ. Яг ямар байгаа талаар товч тодорхой хариулт өгөөч?

-Санхүүгийн нөхцөл байдал маш сайн байгаа. Өнөөдрийн байдлаар улсын төсөвт 541.2 тэрбум төгрөг төвлөрүүлсэн бол 808 тэрбум төгрөгийн цэвэр ашигтай ажиллаж байна. Оны эцэс гэхэд Эрдэнэс Таван толгой ХК-ийн 2022 оны татварын дараах цэвэр ашиг нэг их наяд төгрөгт хүрэхээр байгаа.

-Түүнчлэн ЗГХЭГ-ын дарга Д.Амарбаясгалан шаардлагатай бол холбогдох албан тушаалтныг томилж, чөлөөлөхийг Засгийн газрын онцгой бүрэн эрхт төлөөлөгч Ж.Ганбатад олголоо гэж хэлсэн. Энэ нь таны багийг огцруулах юм байна гэсэн ойлголтыг нийгэмд өгчихлөө. Үүнд хариулт өгөөч?

-Тухайлсан дөрвөн асуудлаар ажлын хэсэг болон бүрэн эрхт төлөөлөгч нар хамтран ажиллаж эхэлсэн. Манайх чинь ХК шүү дээ. Манай хувьцаа эзэмшигчдийн хурал болон ТУЗ бүрэн бүрэлдэхүүнээрээ байна. Мөн СЕО ажлаа хэвийн үргэлжлүүлж байна. Бидний ажил хэвийн явагдаж байна. Засгийн газрын тогтоолоор үндсэн болон үйлдвэрлэлийн үйл ажиллагааг хөндөхгүй, хэвийн явуулах гэж хатуу заасан. Энэ ажлын хэсэг, бүрэн эрхт төлөөлөгчөөс маш сайн нэгдсэн ойлголт, үндсэн тоон үзүүлэлт бүхий тайлан гарна гэдэгт итгэх хэрэгтэй. Нийгэм дэх төрөл бүрийн хардлага, гүтгэлгүүд ч зогсоно. Баг, бүрэлдэхүүн бол Эрдэнэс Таван толгойн өөрийнх нь л баг шүү дээ. Явагддаг ажлууд явдгаараа л үргэлжилнэ

Б.Ганхуяг: Ч.Хүрэлбаатар сайдын засгийн газар, ҮАБЗ, бусад газруудад танилцуулсан мэдээлэл илт гүтгэсэн тоон мэдээллүүд байсан