Эдийн засгийн хямралтай байгаа энэ цаг үед Монголын дугуйн холбоо хэмнэлтийн бодлогыг дэмжиж шинэ жилийн арга хэмжээг зохион байгуулахгүйгээр “2022 оны Шилдэг тамирчдыг шалгаруулах Ёслолын арга хэмжээ”-г зохион байгууллаа.

Монголын дугуйчид 2022 онд амжилт бүтээл арвин, түүхэн амжилтуудыг эвдсэн, шинэлэг үйл явдлаар дүүрэн байлаа.

Тодруулбал, Засмал замын дугуйн Азийн АШТ-нд амжилттай оролцож 2 мөнгө, 3 хүрэл медаль авч Тажикистаны тэнгэрт нийт 5 удаа Монгол улсынхаа далбааг мандуулан Азийн АШТ-нээс анх удаагаа Багийн уралдаанд мөнгөн медаль хүртэв.

Монголын дугуйн холбоо анх удаа дэргэдээ хагас мэргэжлийн “FEREI Mongolia Development Team” багийг байгуулж “UCI Asia-Tour” Азийн цуврал тэмцээнүүдэд оролцох эрхтэй болж UCI оноог цуглууллаа.

ОУХМ С.Жамбалжамц “Tour de Langkawi” Pro Tour тэмцээний Азийн шилдэг тамирчин болж чансаагаараа Дэлхийд 160 дугаарт байрт, Ази тивдээ 2 дугаар байрт эрэмбэлэгдэж Монголын дугуйн спортын дээд амжилт үзүүлэв.

2016 Трек дугуйн Залуучуудын Дэлхийн аварга ОУХМ Б.Тэгшбаяр Энэтхэг улсад зохион байгуулагдсан Трек дугуйн UCI Level 1&2 дасгалжуулагчийн сургалтад хамрагдаж Монголын дугуйн спортын анхны TRACK-ийн UCI зэрэгтэй дасгалжуулагч боллоо.

2022 оны 9 дүгээр сараас Дугуйн улсын шигшээ баг 19 жилийн дараа эргэн байгуулагдаж Ахлах дасгалжуулагчаар ОУХМ Т.Төгөлдөр, туслах дасгалжуулагчаар ОУХМ Б.Мягмарсүрэн нар томилогдож Монголын шигшээ баг 10 тамирчнаар багаа бүрдүүлэв.

Мэргэжлийн Дэлхийн АШТ-ий Элитүүдийн 269км-ын бөөн гараат уралдаанд дэлхийн 50 орны шилдэг 169 тамирчин оролцсоноос Монгол улс анх удаагаа энэ жил дэлхийд чансаагаараа 34-р байрт жагсан 2 эрх /өмнө нь нэг эрх/ авч ОУХМ С.Жамбалжамц, Э.Билгүүнжаргал нар оролцож түүхэн шинэ хуудсыг нээсэн анхдагчид болсон билээ.

Түүнчлэн Монголын дугуйн холбоо энэ жил дэлхийд 35 дугаарт, Азидаа 2 дугаарт эрэмбэлэгдсэн түүхэн амжилт гаргасан.

Ёслолын үйл ажиллагаанд УИХ-ын гишүүн, Монголын дугуйн холбооны дэд ерөнхийлөгч Ц.Мөнхцэцэг оролцсон. Тэрээр халуун баяр хүргэхийн сацуу улсын болон олон улсын тэмцээнүүдэд амжилт гаргасан, Улсын зэрэг цол биелүүлсэн тамирчдадаа өндрөөс өндөр амжилтыг хүсэн ерөөж, баяр хүргэсэн юм.

Монголын дугуйн холбооноос 2022 оны шилдгүүдээ тодрууллаа