УИХ-ын чуулганаар хэлэлцэгдэж буй “Төмөр замын тээврийн” тухай хуулийг шинэчлэн найруулах ажлын хэсгийг УИХ-ын гишүүн Ж.Бат-Эрдэнэ ахлан ажиллаж байна. Тэрээр ажлын хэсэг анх өргөн баригдсан хуулийн талаас илүү хувийг нь шинэчилж, либералчлагдсан олон компани өрсөлдөхүйц эрхийг нээсэн шинэ хууль болж байгаа гэдгийг илэрхийлсэн.

Энэ хуулийг 2007 онд анх баталж байсан бол өнгөрсөн 16 жилийн хугацаанд тус салбарт гарсан олон өөрчлөлттэй холбоотойгоор уг хуулийг үндсээр нь өөрчлөх шаардлага үүссэн. Сүүлийн 10 гаруй жилийн хугацаанд төмөр замын тээврийн салбарт өмчийн олон хэлбэр бүхий хуулийн этгээд бий болж, хэрэглэгчийн тоо өссөн бөгөөд 2010 оны байдлаар суурь бүтэц эзэмшигч, тээвэрлэгч 1 байсан бол өдгөө суурь бүтэц эзэмшигч 4, тээвэрлэгч 4, суурь бүтэц барих, угсрах эрх бүхий 253, дагнасан болон салбар зам, талбай, хөдлөх бүрэлдэхүүн эзэмшигч 250 орчим болсон. Харин дээрх хууль батлагдсанаар төмөр замын тээвэрлэлттэй холбоотой харилцаа илүү тодорхой, оновчтой болж, тээвэрлэлтийн үйл ажиллагаанд оролцогчдын тэгш оролцоог ханган, хөрөнгө оруулалт, тээвэрлэлтийн үр ашгийг нэмэгдүүлэх буюу нэг үгээр энэ салбарт "ЛИБЕРАЛЧЛАЛ" хийхээр зорьж байгаа хэмээн ажлын хэсгийн ахлагч УИХ-ын гишүүн Ж.Бат-Эрдэнэ онцлоод байгаа.

Түүний хувьд Зам тээврийн сайдаар ажиллаж байхдаа агаарын тээврийн салбарын хөгжилд өрсөлдөх чадвар чухал хэмээн үзэж МИАТ- компанитай бусад аж ахуйн нэгжийг өрсөлдөх боломжийг бий болгож либералчлалыг эхлүүлсэн. Энэ нь өрсөлдөөнийг бий болгосон бөгөөд өнөөдөр энэ либералчлалыг үргэлжлүүлж хийх хэрэгтэй гэж үздэг. Үүнтэй адил төмөр замд мөн либералчлал хийгдэнэ. “Төмөр замын тээврийн” тухай хуулийн гол зорилго нь ерөөсөө энэ гэдгийг тайлбарлаж байгаа юм. Өөрөөр хэлбэл Төмөр замыг нэг сүлжээ болгож либералчилна. Ингэснээр тээвэрлэгч компани хэний ч зам байсан нэг л төлбөр төлөөд нийтийн дүрэм, стандартаар тээврээ хийх боломжийг нээж өгнө. Энэ бол том либералчлалыг бий болгосон шинэ хууль юм.

Сэтгүүлч

Сэтгүүлч Ц.Соёлмаа soyolmaa@vip76.mn