Ес дэх удаагийн сонгуулийн үр дүнгээр байгуулагдсан салбар, салбарын төлөөллөөс бүрдсэн 126 гишүүнтэй парламент анхны намрын ээлжит чуулганаа өндөрлүүлсэн. Энэ удаагийн парламент 11 байнгын хороотой ажиллаж байгаа бөгөөд намрын чуулганаар байнгын хороод хэрхэн ажилласан талаар тайлангаа тавьж байгаа. Улсын Их Хурлын Төрийн байгуулалтын байнгын хороо 2024 оны намрын ээлжит чуулганы хугацаанд 19 удаа хуралдаж, 39 асуудлын хүрээнд 12 хуулийн төсөл, Улсын Их Хурлын 25 тогтоолын төсөл, Байнгын хорооны 6 тогтоолын төслийг хэлэлцэн шийдвэрлэжээ.

УИХ-ын даргын захирамжаар хууль тогтоомжийн төслийг хэлэлцүүлэгт бэлтгэх үүрэг бүхий 4 ажлын хэсэг ажиллаж байна. Тодруулбал, “Нийслэл Улаанбаатар хотын 2040 он хүртэлх хөгжлийн ерөнхий төлөвлөгөөг батлах тухай” мөн Нийтийн өргөдлийн цахим системд иргэн Н.Анхзаяагийн “Нарансэвстэйн боомтыг сэргээж, нээнэ” гэсэн заалтыг хасуулах талаар гаргасан саналыг судлан үзэж, шийдвэрийн төсөл боловсруулах үүрэг бүхий ажлын хэсгийг Байнгын хорооны дарга Ж.Бат-Эрдэнэ ахлан ажиллаж байна. Энэ саналыг судалж, шийдвэрийн төсөл боловсруулах ажлын хүрээнд өргөдөл гаргасан иргэн Н.Анхзаяа болоод мэргэжлийн хүмүүстэй уулзжээ. Үргэлжүүлэн өргөдөлд нэр дурдагдсан боомтын захиргааны ажилтнууд, орон нутгийн иргэдтэй уулзаж, бусад судалгаа мэдээлэлд үндэслэн шийдвэрийн төслөө танилцуулан, хэлэлцүүлэх юм байна.

Байнгын хороо эрхлэх асуудлынхаа хүрээнд Хархорум хотын бүтээн байгуулалт, хөгжлийг дэмжих тухай, Улс төрийн намуудын тухай хуулийн шинэчилсэн найруулгыг дагаж мөрдөх журмын тухай зэрэг хамаарах 8 хууль, Улсын Их Хурлын 25 тогтоолын төслийг нэгдсэн хуралдаанаар эцэслэн батлуулжээ.

Түүнчлэн Байнгын хорооны 6 тогтоолыг баталж, 1 хэлэлцүүлэг, батлагдсан хууль тогтоомжийг олон нийтэд сурталчлах 2 ажлыг зохион байгуулжээ. Байнгын хорооны гишүүд чуулган завсарласан үед тойрогтоо ажиллах, салбарын төлөөллүүд, иргэдтэй уулзах, ажлын хэсгүүдийн үйл ажиллагааг эрчимжүүлэх зэрэг зохион байгуулалтын ажил хийгдэнэ. Цаашдаа УИХ хууль баталдаг, тогтоол шийдвэр гаргадаг байгууллага байгаад зогсохгүй хяналтын болон бусад чиг үүргээ үр дүнтэй хэрэгжүүлэх чиглэлээр ажиллах ажээ.

Сэтгүүлч

Сэтгүүлч Ц.Соёлмаа soyolmaa@vip76.mn