Өнгөрсөн оны ажил үйлсээрээ манлайлан “Улсын аварга тариаланч хамт олон”-оор шалгарсан Сэлэнгэ аймгийн Ерөө сумын "Ачит буурагчин" ХХК-ийн хамт олонд шагналыг гардуулан өглөө.

“Ачит Буурагчин” ХХК нь 2008 онд улаанбуудай тариа тариалах чиглэлээр 545га эргэлтийн талбайтай байгуулагдаж байсан бол өдгөө Ерөө, Жавхлант сумдад нийт 754.5 га эргэлтийн талбайтай, үндсэн болон туслах 8 ажилтантайгаар улаанбуудай тариалан тасралтгүй 16 дахь жилдээ үйл ажиллагаа явуулж байна.

Төрөөс баримталж буй бодлого, чиглэлийг чанд баримтлан хөдөө аж ахуйн зохистой дадлын хүрээнд мэргэжлийн агрономч талбайн түүх хөтөлж, тариалан үйлдвэрлэлийн нэгдсэн системд бүртгүүлэн ургамлын гарал үүсэл, талбайн түүх хөтлөлтийг цахимаар хийж гүйцэтгэж байна. Мөн газар тариаланг эрчимжсэн аргаар эрхлэх зорилго тавин буудайг ургалтын үед өсөлтийг нь идвэхжүүлэх, стрессээс хамгаалах зэрэг ажлыг хийж стандартын шаардлага хангасан үрийг дотооддоо бэлдэн тариалж, хөрсөө хамгаалах шинэ технологийг нэвтрүүлж сүрлийг талбайд нь хэрчин цацах зэрэг ажлуудыг тогтмол хийж байгаа аж.Тус компани 2024 онд 500га талбайгаас 1603тн улаанбуудай хураан авчээ.