УИХ-ын чуулганы өнөөдрийн \2021.01.28\ нэгдсэн хуралдаанаар Монгол Улсын Шүүхийн тухай хуульд хэсэгчлэн тавьсан Монгол Улсын Ерөнхийлөгчийн хоригийг хэлэлцэж байна. Ерөнхийлөгчийн хоригтой холбоотойгоор УИХ-ын гишүүд асуулт асууж, санал хэллээ. УИХ-ын гишүүн Ц.Туваан: Ерөнхийлөгчийн хориг дээр яагаад зөрүүтэй хандаж байна. Бүх хориг буруу юу? Албан тушаалтны томилгоог он сар бичихгүй хийдэг үү? Ялыг тэнд төлөвлөдөг үү? Хуулиар хөндөөгүй асуудлыг хөндөхгүй гэсэн байдаг. Яригдаагүй асуудлыг яагаад оруулж ирээд байна. Шүүгч нараас санал авсан уу? Шүүгч нар сэтгэл ханамжгүй байна. Өмнө нь шүүгчийн шинэчлэл гэсэн давлагаа явдаг байсан. Гэхдээ үр дүнгүй. Энэ Шүүхийн хууль бас ийм болчих вий дээ. Бие биенийхээ дотоод асуудалд оролцохгүй байя. Шүүхийн байгууллагууд зөв шийдвэр гаргаарай. УИХ-ын гишүүн С.Бямбацогт: Үндсэн хуулийн 51.2 дээр Дээд шүүхийн Ерөнхий шүүгчийг томилох талаар хуульд тодорхой зааж өгсөн. Энэ хүрээнд хуулийн шинэчлэл хийгдсэн.Ерөнхийлөгч хууль санаачлах, хориг тавих гээд бүрэн эрх нь байгаа. Үүнийг хөндөөгүй. Харин Үндсэн хуулиар олгогдоогүй эрхийн талаар өөрчлөлт орсон. Хөндөөгүй асуудлыг хөндөж болохгүй. Авилгын хууль дээр хөндсөн хууль дээр ажилласан. МУ-ын Ерөнхийлөгчийн Аюулгүй байдал, батлан хамгаалахын бодлогын зөвлөх Л.Болд: МАН-ын дэглэмийн эсрэг жагсаж байсан тэмцлийн үр дүн гарсан. Бидний том үр дүн өнгөрсөн 30 жил албан тушаалтнуудад хариуцлага тооцож чадахгүй байсан бол өөрчлөгдсөн. Гэтэл энэ ухрах гээд байна. Бүхэл бүтэн 36 өөрчлөлтөд хориг тавьсан.
2021-01-28
УУИХ-ын чуулганы өнөөдрийн \2021.01.28\ нэгдсэн хуралдаанаар Монгол Улсын Шүүхийн тухай хуульд хэсэгчлэн тавьсан Монгол Улсын Ерөнхийлөгчийн хоригийг хэлэлцэж байна. УИХ-ын гишүүн Ч.Ундрам: Шүүхийн тухай хуулийн шинэчилсэн найруулгаар Шударга шүүхтэй байх, хараат бус байхыг зорьж хийсэн. Шүүх хараат байгааг би өөрөө 2020 оны УИХ-ын сонгуулиар мэдэрсэн. Миний нэр дэвшсэн тойрог дээр мандатаа авсан Ж. Эрдэнэбат, С.Баярцогт гэсэн хоёр хүнийг Сонгуулийн тухай хуулийг зөрчиж, Сонгуулийн Ерөнхий Хорооноос зөвшөөрөл авахгүй баривчилсан. Энэ хоёр хүнийг маш богино хугацаанд тусгай дансанд 10 тэрбум төгрөг байршуул эсвэл баривчилна гэсэн шаардлага тавьсан. Манай улс хараат шүүхээр 100-д орж, авилгын асуудлаараа ухарсан. Энэ хуулиар зохицуулагдах асуудал учраас хоригийг хүлээж авах боломжгүй юм.
УИХ-ын чуулганы өнөөдрийн \2021.01.28\ нэгдсэн хуралдаанаар Монгол Улсын Шүүхийн тухай хуульд хэсэгчлэн тавьсан Монгол Улсын Ерөнхийлөгчийн хоригийг хэлэлцэж байна. УИХ-ын гишүүн Д.Ганбат: Монгол улсын Ерөнхийлөгчийн хоригт хүндэтгэлтэй хандах хэрэгтэй. 2017 онд авилга албан тушаал, оффшор, шударга шүүхийн төлөө амлаж нэр дэвшсэн. Хамгийн хийх боломжтой хүнийг ард түмэн сонгосон.Удахгүй Ерөнхийлөгчийн сонгууль болно. Энэ хоригийг хүлээж авахгүй байгаагаараа 2021,2024 оны сонгуульд ялагдчихлаа. 2024 онд олон хүн шоронд явахаар байдалтай юм шиг байна. Ард түмэн итгэж Ерөнхийлөгчийг сонгосон. УИХ дээр Шүүхийн багц хууль гарч байгаатай холбогдуулан олон хүн байр сууриа илэрхийлсэн. Хууль зүйн дотоод хэргийн сайд Х.Нямбаатар энэ ордны зүүн жигүүрийн 3 давхарт шүүгч нарт ял өгөх даалгавар өгдөг гэж ярьсан. Тайлбар авъя. Гишүүн С.Бямбацогт хуулийн үр дүн 5-6 жилийн дараа гарна гэсэн. Яагаад үр дүн ийм хожуу гарч байна вэ? Ажлын хэсгийн гишүүн Ц.Мөнх-Оргил болохгүй бол 500 шүүгчид 2-3 жилийн дараа адистачлал явуулна гэсэн. Шүүх хараат бус байх ёстой. ЕТГ-ын дарга Ө.Шижир : Өнгөрсөн 7 хоногт Ерөнхийлөгч уруу УИХ-ын чуулганы танхимаас гишүүд санаатай болон санаандгүй их дайрч байгаа. Өргөдлийн аваад томилдог,ял шийтгэл өгдөг гэж бүгд гүтгэлэг. УИХ-ын гишүүн чуулган дээр хэлсэн үгнийхээ төлөө хариуцлага оногдуулахгүй гэсэн хуулийн заалтаараа далимдуулж Ерөнхийлөгч уруу дайрч болохгүй. Монгол улсын Үндсэн хууль дээр Ерөнхийлөгчийн нэр төр халдашгүй байна гэж заасан байдаг. Гишүүд маань аливаа асуудалд хандахдаа хариуцлагатай байх хэрэгтэй. Ерөнхийлөгчийн тавьсан хориг дээр ажил хэрэгч, хариуцлагатай хандсан.Та бүхэн бас ингэж хандах хэрэгтэй. УИХ-ын гишүүн С.Бямбацогт: Тавьсан хоригийн хүрээнд ярих хэрэгтэй. Хаа хаанаа хуулиа дээдлэх хэрэгтэй. Бид шударга шүүхтэй байх, хараат бус, сахилгатай шүүгчтэй байх ёстой учраас энэ хуульд өөрчлөлт оруулсан. Ерөнхийлөгчийн санал, цөөнхийн саналыг авч баталсан.
УИХ-ын чуулганы өнөөдрийн \2021.01.28\ нэгдсэн хуралдаанаар Авлигын эсрэг хуульд өөрчлөлт оруулах тухай хуульд хэсэгчлэн тавьсан Монгол Улсын Ерөнхийлөгчийн хоригийг хэлэлцэж байна. Ерөнхийлөгчийн хоригтой холбоотойгоор УИХ-ын гишүүд асуулт асууж, санал хэллээ. УИХ-ын гишүүн Ц.Туваан: УИХ-ын дэд дарга Аюурсайханы үгэнд талархаж байна. Монгол улсын 32 дахь Ерөнхий сайд Л.Оюун-Эрдэнэ ард түмнийхээ төлөө гэсэн зоригтой үг хэлж байсан, талархаж байна. Асуусан асуултанд хариулагдсангүй. Хаалттай энэ асуудалд хандъя гэж хэд хэдэн гишүүд хэллээ. Бидний хэрэлдэж, уралдаж гаргадаг төсөв алдагдалтайгаа нийлээд 12-13 Их наяадын талаар ярьдаг. Монгол улсын төсвийн гуравны нэгтэй тэнцэх мөнгөний тухай яригдаад эхэлсэн байна. Бид яагаад дуугүй суугаад байна вэ? Авилгатай тэмцэх газрын дарга нар сайн ажилласан байна. Хаалттай хуралдаад үнэн зөв мэдээлэл авъя. Том, ноцтой асуудал яригдаж байгаа, гадаа өлсгөлөн зарласан, Оюутолгойн асуудал гээд олон асуудал байна. Үүнийгээ ярилцаад шийдээд явъя. Гурван сая хүмүүсийн эрх ашгийн төлөө ажиллая.
УИХ-ын чуулганы өнөөдрийн \2021.01.28\ нэгдсэн хуралдаанаар Авилгын эсрэг хуульд өөрчлөлт оруулах тухай хуульд хэсэгчлэн тавьсан Монгол Улсын Ерөнхийлөгчийн хоригийг хэлэлцэж байна. Ерөнхийлөгчийн хоригтой холбоотойгоор УИХ-ын гишүүд асуулт асууж, санал хэллээ. УИХ-ын гишүүн Л.Мөнхбаатар: Ерөнхийлөгчийн хоригийг хүлээж авахгүй байх хэд хэдэн үндэслэл байна. Бид хууль болон тодорхой асуудлыг хэлэлцэхдээ төрийн эрх мэдэл хувиарлах зарчмынхаа хэрэгжилтийг хангаж, харилцан хяналт тэнцлийг хангах хэрэгтэй. Ерөнхийлөгч, Их хурал, Засгийн газар, Шүүх эрх мэдлийн субъект хоорондын харилцан тэнцэлд сөргөөр нөлөөлсөн зүйл бий. Засгийн газар авилгатай тэмцэх чиглэлд анхаарах нь зүйтэй. Иймд Ерөнхийлөгчийн хоригийг хүлээн авах боломжгүй байгаа юм.
