УИХ-ын чуулганы нэгдсэн хуралдаанаар Хамтын тэтгэврийн тухай хуулийн төслийн анхны хэлэлцүүлгийг хийлээ.

УИХ-ын гишүүн Д.Тэрбишдагва “Энэ хууль батлагдсан ч Төсвийн тодотгол хийсний дараа хэрэгжих үү. Хэрэгжих хугацааг нь мэдмээр байна. Уг хуулийг хэрэгжүүлснээр Улсын төсөвт ямар ачаалал үүсэх бол. Тэжээгчээ алдсаны тэтгэвэртэй уялдаагүй гэсэн. Нийгэмд үүсч буй бухимдлуудаас шалтгаалаад тэжээгчээ алдагчид нэмэгдэж байна. Тэжээгчээ алдагчидын тэтгэмжийн хэмжээ дэндүү бага байгаа. Цаашид энэ асуудалд бодлогын хэмжээнд анхаарах цаг болсон юм биш үү”

УИХ-ын гишүүн Ө.Энхтүвшин “Сонгууль дөхөхөөр энэ асуудал яригддаг. Үүнийг хэдэн оноос, хичнээн төгрөгөөр хэрэгжих боломжтой байгаа вэ гэдгийг нарийн хэлэх ёстой. Хууль гарсан ч хямрал болж байгаа учраас өгөх боломжгүй гэж яриад хэрэггүй. Өгөх гэж байгаа юм бол шууд өгөх хэрэгтэй. Бурхан болсон хойно нь үүнийг ярина гэхээс илүү амьд байгаа хүмүүстээ өгөх тэтгэврийн мөнгөө боломжтой бол нэмэх ёстой. Гоё нэртэй хуулиуд гаргаж байгаа хэдий ч амьдрал дээр хэрэгжихгүй байна” гэлээ.

“Гоё” нэртэй хуулиуд амьдрал дээр хэрэгжихгүй байна