Монголын үйлдвэрчний эвлэлүүдийн холбооны  татварыг зогсоосонтой холбоотой маргааныг Улсын Дээд шүүх хэлэлцээд иргэд, хөдөлмөрчдийн эвлэлдэн нэгдэх эрхийг ноцтой зөрчсөн гэж үзсэн талаар тус холбооныхон өчигдөр мэдээлэл хийв.

Тодруулбал, нийслэлийн Засаг даргын Нийгмийн хөгжлийн асуудал хариуцсан орлогч Ц.Энхцэнгэл үйлдвэрчний эвлэлийн татварыг зогсоох тухай 2015 оны хоёрдугаар сарын 02-ны өдрийн 2/337 тоот хууль бус албан бичиг гаргаснаас энэхүү маргаан үүссэн байна. Мөн нийслэлийн эмнэлэг, сургууль, цэцэрлэгүүдэд үйлдвэрчний эвлэлийн гишүүдийн татвар төлөхийг зогсоосон аж. Нэг жилийн хугацаанд үргэлжилсэн уг маргаан гурван шатны шүүхээр орж, Улсын Дээд шүүхийн Захиргааны хэргийн танхим уг шийдвэрийг эцсийн байдлаар хүчингүй болгожээ.

Дээд шүүхээс Ц.Энхцэнгэлийг үйлдвэрчний эвлэлийн гишүүн хамтын гэрээгээр тохиролцсоны үндсэн дээр татварыг цалингаас бэлэн бусаар суутган авах харилцаанд хөндлөнгөөс оролцож, эрх мэдлээ хэтрүүлсэн гэж үзсэн байна. Дээрх хууль бус шийдвэрээс үүдэн олон мянган гишүүн хохироод байна гээд орон нутаг, нийслэл, эрүүл мэнд, боловсролын салбарын үйлдвэрчний эвлэлийнхэн учирсан хохирлоо нэгтгэн нэхэмжэлнэ гэдгээ энэ үеэр мэдэгдсэн юм.

Монголын эрүүл мэндийн ажилтны үйлдвэрчний эвлэлийн холбооны дарга Б.Мягмар “Өнгөрсөн оны хоёрдугаар сараас хойшх бүтэн жилийн хугацаанд эрх ашиг нь зөрчигдсөн эмнэлгийн ажилнууд болон багш нар, УСУГ зэрэг олон байгууллага бий. Үйлдвэрчний эвлэлийн анхан шатны 398 хороо, зөвлөл салбар энэ хугацаанд ажлаас үндэслэлгүй халагдсан хүмүүст өмгөөллийн туслалцаа үзүүлэх, тэтгэмж, хууль эрх зүйн сургалт, хамтын тэмцэл хөдөлгөөн өрнүүлэх, хөдөлмөрийн үнэлэмжийг нэмэгдүүлэх зэрэг олон ажлаа тасалдуулсан. Үүнээс үүдэн их хэмжээний хохирол амссан. Гишүүдийн татвар, үйл ажиллагааны хохирол, шүүх хурлын явцад гарсан зардал зэргийг нэгтгэж хохирлоо төлүүлнэ” гэв.