УИХ-ын гишүүн Лувсангийн Энхболдын санаачилгаар Өмнөговь аймгийн Улаанбаатар хот дахь 500 оюутны хотхоны барилгын шав тавих ёслол 2019.09.28-ны өдөр ёслол тѳгѳлдѳр болов.

Шав тавих ёслолд УИХ-ын гишүүн Л.Энхболд, Өмнөговь аймгийн Засаг даргын тамгын газрын дарга Ө.Баянмөнх, Даланзадгад сумын засаг дарга Т.Алтансүх, Өмнөговь аймгийн оюутнуудын төлөөлөл оролцлоо.

Оюутны хотхон төслийг анх УИХ-ын гишүүн Л.Энхболд санаачилсан бөгөөд бүтээн байгуулалт нь орон нутгийн төсөв буюу бусад төсөл хөтөлбөрийн санхүүжилтээр хийгдэх юм. Уг оюутны хотхоныг Улаанбаатар хотын Хан-Уул дүүрэгт байгуулахаар болсон ба гүйцэтгэлийг Өмнөговь аймгийн Мэндийн говь компани хийж гүйцэтгэхээр болжээ.

УИХ-ын гишүүн Л.Энхболд хэлэхдээ, Бид түүхэн үйл явдлын гэрч болж байна. Өмнөговь аймаг Монгол улсын эдийн засгийг авч явж байгаа өөрөө өөрийгөө санхүүжүүлдэг онцлог давуу талтай аймаг. энэ хүрээнд уул  уурхай хөгжиж, уул уурхайг дагасан маш олон аж ахуй нэгжүүд бий болж чадвартай боловсон хүчин мэргэжилтнүүдийг шаардаж байна. 

Тэрээр үргэлжлүүлэн, Монголын Улсын эдийн засгийг авч явж буй аймгийн оюутан залуучууд маань сайн боловсон хүчин болж бэлтгэгдэх ёстой. Тиймээс оюутан залуусынхаа амьдрах орчиндоо санаа зовж явсан асуудлыг өнөөдөр энд цэг тавьж байна. Оюутны хотхоны асуудлыг бид 5 жилийн өмнөөс ярьсан. Газар нутгийг шийдэхэд нилээд хүндрэлтэй байдаг юм байна. Их хурлын гишүүний хувьд оюутнуудаа тав тухтай амьдрах орчноор хангахад нэг чухал үйл явдлыг хийж байна гэж харж байна. Мөн манай Өмнөговийн компани барьж гүйцэтгэж байгаа учир чанартай цаг хугацаанд нь хийж гүйцэтгэнэ гэж найдаж байна гэдгээ илэрхийллээ.

500 оюутны амьдрах боломжтой уг хотхоныг байгуулснаар чанартай боловсон хүчнийг бэлтгэхэд сурах орчинг бүрдүүлж өгч байгаагаараа онцлог юм. Мөн төслийн багийнхны тооцоолж байгаагаар нэг оюутан жилд 300-400 мянган төгрөгийн зардлаар уг хотхонд амьдрах боломжтой болох юм байна. 

Өмнөговь аймгаас жилдээ 500 орчим хүүхэд оюутан болж Улаанбаатар хотыг зорин ирж байгаа судалгааг "Говийн хүү" сангаас гаргажээ. Одоогоор тус аймгаас Улаанбаатар хотод 2500 гаруй оюутан сурч байгаа бөгөөд тэдний 48 хувь нь түрээсийн байранд, 19 хувь оюутны байранд, 29 хувь нь хамаатан садан найз нөхдийндөө амьдарч байгаа гэсэн судалгааг мөн гаргасан байна.

Хотхоны барилгын ажил 2019.09.28-ны өдөр эхэлж 2020.12.01-нд ашиглалтад орно. Мөн УИХ-ын гишүүн Л.Энхболд ашиглалтад орсны дараа эхний 500 оюутныг төлбөрөөс бүрэн чөлөөлж үнэ төлбөргүй амьдрах орчноор хангана гэдгээ илэрхийлж оюутан залуус маш их баяртай байгаагаа илэрхийлж байлаа.