Улсын Их Хурлын чуулганы өнөөдрийн /2019.10.11/ үдээс хойших нэгдсэн хуралдаанаар УИХ-ын гишүүн С.Бямбацогтын асуулга болох сайжруулсан түлшний талаарх Засгийн газрын мэдээллийг сонсч байна. Асуулгын хариуг Шадар сайд Ө.Энхтүвшин танилцууллаа.

Асуулгын хариутай холбогдуулан УИХ-ын гишүүд асуулт асуулаа. 

УИХ-ын гишүүн Л.Болд: 

"Би Хан-Уул дүүрэгт ажиллаж, нөхцөл байдалтай танилцсан. даваа гаригт шуурхай хурал хийж, мэдээлэл авч Засгийн газарт чиглэл өгсөн. Угаар мэдрэгчийг айл өрхүүдэд өгөх чиглэлийг Засгийн газар шуурхай шийдвэрлэлээ. Талархаж байна. Яалт ч үгүй хариуцлага ярих хэрэгтэй. 1980-аад онд Багануурын уурхайд намайг ажиллаж байхад шахмал түлшний асуудал яригддаг байсан. Өнөөдөр үйлдвэрлэсэн нь Засгийн газар зоригтой хийсэн. Зоригтой хийснийг нь сайшааж байна. Агаарын бохирдлыг хэмжигч аппликэйшнээр харахад Улаанбаатарх от ногоон байна. Харин Налайхт шахмал түлш хэрэглэхгүй байна. Тэнд улаан харагдаж байна. Тиймээс урьд ийм байгаагүй учраас үр дүн харагдаж байна. 

Харин зөвлөмж, мэдээлэл, зөвлөгөөг их эрт тараах байсан. Үүний ард л асуудал байна. Засгийн газар арга хэмжээ авах ёстой. Амиа алдсан 6, эрүүл мэндээр хохирсон 200 хүнд нөхөн олговор өгөх ёстой. Хуулийн дагуу шалгаад өөрийн буруугаас биш энэ түлшнээс болсон бол энэ хүмүүст нөхөн олговор өг.

Дизелиэр явдаг машин бензинээр явдаг болохын тулд тодорхой хэмжээний өөрчлөлтийг хийх ёстой. Тиймээс айл өрхүүдэд сонголт өгөх ёстой. Зуух нь бэлэн биш айлуудад хүрэн нүүрсээр нь хангах ёстой. Шөнө болгон мэдрэгч нь дугараад иргэд унтах аргагүй болно. Амь насаа хамгаалах бололцоог нь хангаж өгөх ёстой.

Нөгөө талдаа Гэр хорооллын хөгжлийн хуулийг бид өргөн барьсан. Энэ хуулийг нэн яаралтай батлах шаардлага байна."

Түүний асуултанд Эрчим хүчний сайд Ц.Даваасүрэн хариуллаа.