Улсын Их Хурлын чуулганы өнөөдрийн /2019.10.11/ үдээс хойших нэгдсэн хуралдаанаар УИХ-ын гишүүн С.Бямбацогтын асуулга болох сайжруулсан түлшний талаарх Засгийн газрын мэдээллийг сонсч байна. Асуулгын хариуг Шадар сайд Ө.Энхтүвшин танилцууллаа.

Асуулгын хариутай холбогдуулан УИХ-ын гишүүд асуулт асуулаа. 

УИХ-ын гишүүн Д.Оюунхорол:

"Агаар орчны бохирдлын хамгийн өндөр байгаа орчин бол гэр хорооллын айл өрхүүдээс гарч байгаа утаа юм. Агаарын бохирдлын 80%-ийг түүхий нүүрснээс гарч байна. Агаар орчны бохирдлыг бууруулах чиглэлээр Үндэсний хороо хэмжиж, шалгаж дүгнэж, тодорхой ажлууд хйиж байна.

10 дугаар сарын 04-10-ны өдрүүдэд болсон иргэд угаартсан явдал нэмэгдэх байдал харагдаж байна. Үүнд маш их харамсаж байна. 6 хүн амиа алдсан гэр бүл, айл өрхүүдэд гүн эмгэнэл илэрхийлж байна. Засгийн газар нөхөн төлбөрийн асуудал шийдвэрлэх байх. Бид санал тавьж хөөцөлдөн олгуулах талаар анхаарна.

Агаарын бохирдлын хэмжээ тодорхой хэмжээнд буурч байгаа гэдэгтээ олон хүн санал нэгдэж байна. Бид агаарын бохирдлыг бууруулах чиглэлд шийдвэртэй арга хэмжээ аваад цааш нь хэрэгжүүлээд явах байх. Шахмал түлшний асуудлаар сайн муу зүйл ярьж, мэдээлэл тарж байгаа. Үүнийг улс төрийн зорилгоор ашиглахгүй, ажлаа ярьж, цэгцтэй цааш авч явах нь хамгийн чухал байна. Өнөөдөр үнэн зөв дүгнэлт гаргаж, ажилд гарсан алдаа оноогоо дүгнэн цэгнэх, шинжилгээний хариунуудыг гаргаж алдаагаа засаад явах ёстой.

Би Баянзүрх дүүргийн 21, 27, 2 гэсэн гэр хороололтой тойргоос сонгогдсон. гарсан зөрчлүүдтэй холбоотойгоор манай тойргоос гомдол санал ирээгүй байна."