Улсын онцгой комисс өнөөдөр /2020.03.17/ цаг үеийн нөхцөл байдалтай холбогдуулан шуурхай хуралдлаа. Хуралдаан дуусч, гаргасан шийдвэрийн талаар яг одоо мэдээлэл хийж байна.

Энэ удаагийн хуралдаанаар шинэ төрлийн коронавирусний халдварын нөхцөл байдал, үүсээд байгаа асуудалтай холбоотойгоор эмнэлгийн байгууллагуудын үйл ажиллагааг сайжруулах талаар болон нүүрсний экспорт, гадаад байгаа 1000 орчим иргэнийг авч ирэх зэрэг асуудлыг хэлэлцжээ.

Эрүүл мэндийн сайд Д.Сарангэрэл "Шинэ коронавирусний халдвар дэлхийн 164 оронд тархаж, 7000 гаруй хүн нас бараад байна. Монгол Улсад шинэ коронавирусний анхны тохиолдол болж оношлогдсон Франц улсын иргэний биеийн байдал тогтвортой байна.

Өчигдөр шөнө Монгол Улсын гурван иргэнээс коронавирусний халдвар илэрсэн тул өнөөдөр өглөө PCR аппаратаар дахин шинжилж, оношийг баталгаажуулсан. Тухайн гурван иргэнтэй ойр байсан нийт 110 хүнээс шинжилгээ авсан. Одоогоор 61 хүний хариу сөрөг гарсан. Бусад хүмүүсийн шинжилгээний хариу удахгүй гарна.

Монгол Улсад бүртгэгдсэн дөрвөн халдварын тохиолдол бүгд зөөвөрлөгдөж орж ирсэн.

Гурван иргэний биеийн байдлын тухайд хувь хүний нууцтай холбоотой учраас дэлгэрэнгүй зарлах боломжгүй. ХӨСҮТ-ээс БНСУ-аас ирсэн хоёр иргэний биеийн байдал тогтвортой. Берлинээс ирсэн иргэний байдал хүнд байна гэсэн мэдээллийг өгсөн" гэв.

"Халдвар илэрсэн иргэдтэй ойр байсан 61 хүний хариу СӨРӨГ гарсан"