УИХ-ын чуулганы өнөөдрийн \2020.11.19\ нэгдсэн хуралдаанаар "Коронавируст халдвар /КОВИД-19/-ын цар тахлаас урьдчилан сэргийлэх, тэмцэх чиглэлээр Монгол Улсын Засгийн газраас авч хэрэгжүүлж байгаа ажлын явц, үр дүн, цаашид авч хэрэгжүүлэх арга хэмжээний талаар" мэдээллийг сонсож байна.

Мэдээлэлтэй холбогдуулан УИХ-ын гишүүд асуулт асууж байна. 

УИХ-ын гишүүн М.Оюунчимэг асуулт асуулаа:

Гэр хорооллын айлуудад түлшний үнэ өсч байна. Түлшний үнийг нэг удаа буруулах, түгээлт дээр онцгой арга хэмжээ авах хэрэгтэй байна. Үүн дээр ямар арга хэмжээ авч байна вэ?

Ипотекийн зээл дээр асуудал гарч байна. Зээлийн хүүг хойшлуулах бус нэг удаа зээлийн хүүг тэглэх, зоригтой алхам хийх боломж байна уу?

Иргэдийн орлого буурах, ажлын байр хумигдах, хүнсний талон эзэндээ хүрэхгүй байх асуудал гарч байна. Ажлын байрыг хадгалах тал дээр ямар арга хэмжээ авч байна вэ? Хөнгөлттэй зээл, бичил бизнес эрхлэгчдэд зээлийн төслийг баталсан. Энэ хэзээнээс хэрэгжих вэ?

Энхсаран сувилал хэний нэр дээр байна вэ? Хэзээ зөвшөөрөл өгсөн бэ? Зөвшөөрөл өгөхдөө стандартын шаардлага хангаж байна уу үгүй юу гэдгийг мэдэж байсан уу?

Түүний асуултанд Шадар сайд Я.Содбаатар хариуллаа.

Энхсаран сувилал бол Ганчимэг гэдэг хүний нэр дээр эзэмшдэг. Хүүхэд нь Түмэнбаяр гэдэг. 3 сарын 3-ны өдөр тусгаарлах байрны зориулалтай ашиглахаар ажлын хэсгийн дүгнэлт гаргаж шийдвэрлэсэн.

Хатуу хөл хорионы дэглэм сахиулах, хотын хөл хөдөлгөөний хязгаарлалтаас өөр УОК эргэж буцсан шийдвэр гаргаагүй. Маш олон салбар дээр олон арга хэмжээ авч байна. Хотын хөдөлгөөний хязгаарлалт дээр цаг үед нь уян хатан байдлаар зохицуулалтууд хийх, иргэдийн ажил амьдралтай, хүнс, бусад зүйлтэй холбоотой байсан учраас Нийслэлийн онцгой комиссоос арга хэмжээ авсан. Бид өдөр өдрөөр хувь аваад хувьдаа бариулах гэж хийж байгаа учраас ийм өөрчлөлт хийсэн.