Монгол Улсын Их Хурлын гишүүн Д.Батлутын урилгаар Улсын Их Хурлын гишүүн Ж.Чинбүрэн, Хавдар Судлалын Үндэсний Төвийн захирал Н.Эрдэнэхүү нар Орхон аймагт ажиллаж байна.

Орхон аймагт ажиллах үеэрээ Элэг бүтэн Монгол, Эрүүл Эрдэнэт хүн хөтөлбөрийн хүрээнд хийгдэж буй хавдрын эрт илрүүлэх оношилгоо, эмчилгээний үйл ажиллагаатай танилцах, эрүүл мэндийн даатгалын шинэчлэлийн асуудлыг олон нийтэд танилцуулах ажээ.

Мөн орон нутгийн удирдлагуудтай уулзаж эрүүл мэндийн салбартай холбоотой асуудалд санал солилцлоо.

Орхон аймгийн Засаг даргын орлогч С.Батжаргал жилд манай аймгийн арван мянга гаран иргэн яаралтай хагалгаа хийлгэхийн тулд Улаанбаатар хотыг зорьж байна. Түүнчлэн зонхилон тохиолддог гол өвчлөлийн нэг нь тархины цус харвалт, зүрхний импакт өвчлөл байдаг. Энэ өвчлөл жилд 1000 гаруй иргэнд тохиолддог. Энэ асуудлуудаас үүдэж Орхон аймаг орон нутагтаа иргэдээ эмчилдэг болох зорилго тавиад байгааг хэлсэн юм.

Үүний үр дүнд нэн тэргүүнд шаардлагатай байгаа нарийн мэргэжлийн эмч нартай гэрээ хийж орон нутагтаа авчрах ажлыг зохион байгуулахаар боллоо. Тус ажлыг УИХ-ын гишүүн Д.Батлут дэмжин ажиллана гэдгээ илэрхийллээ.

Ингэснээр Улаанбаатар хотод өндөр өртгөөр хийгддэг эмчилгээ болоод хагалгаануудыг орон нутагтаа хийх боломжтой болох юм.

Түүнчлэн Улаанбаатар хотын төв эмнэлгүүдэд байгаа очерийг багасгаж орон нутаг руу чиглүүлэх, үүнийг дагаад санхүүжилт нь орон нутгийн БОЭТ, Медипас эмнэлгүүдэд төвлөрнө гэдгийг хэлэлцлээ.

Хавдар Судлалын Үндэсний Төвийн нарийн мэргэжлийн эмч мэргэжилтнүүд, Орхон аймгийн Засаг даргын Тамгын газар, нийгмийн эрүүл мэндийн төв, БОЭТ, Медипас эмнэлэг 2 дахь жилдээ хамтран ажиллаж байгаа билээ. Тус ажлын хүрээнд энэ жил 5 чиглэлийн хавдрын өвчлөлийг илрүүлэх, оношлох, эмчлэх ажил хийгдэж байна.

Одоогийн байдлаар 1300 хүн үзлэг оношилгоонд орж, 4000 орчим үйлчилгээ авсан байна. Үүний үр дүнд долоон иргэний хавдрын өвчлөлийг илрүүлсэн бөгөөд тэдгээр иргэд орон нутагтаа хагалгаанд орох боломжтой болсон байна.

Нарийн мэргэжлийн эмч нартай гэрээ хийж Эрдэнэт хотод ажиллуулхаар боллоо