Хувиараа тээвэр эрхлэгчдийн ҮЭ-ийн нэгдсэн хорооны гишүүд, жолооч тээвэрчдийн Ажлын байрны баталгаа хангах, төсөл хөтөлбөрөөр дэмжих хэлэлцүүлэг боллоо.

Хэлэлцүүлгийн эхэнд МҮЭХ, ОУХБ-ын хамтарсан төслийн хүрээнд хийж байгаа хэлэлцүүлэг гэдгийг МҮЭ-ийн холбооны ХХХБГ-ын дарга Ц.Отгонтунгалаг онцлоод Нарантуул захад нийтийн тээврийн үйлчилгээ эрхэлж байгаа микро автобусны жолооч нарын ажлын байр буюу тээврийн шугамын эрхээ хадгалах, парк шинэчлэл зэрэг тулгамдсан асуудлыг шийдвэрлэх ҮЭ-ийн санал/гарцыг Зам, тээврийн хөгжлийн яам, Нийслэлийн нийтийн тээврийн үйлчилгээний газар, Улаанбаатар хотын хөгжлийн корпораци ХК-ийн холбогдох албан тушаалтнуудын оролцоотойгоор хэлэлцэх гэж байгаагаараа энэ удаагийн хэлэлцүүлэг чухал ач холбогдолтой юм гэдгийг хэллээ.

ТХГТАҮЭХ-ны дарга Б.Рагчаа: Энэхүү хэлэлцүүлэг нь Хувиараа тээвэр эрхлэгчдийн ҮЭ-ийн хорооны гишүүдийг албажуулах, ажлын байрны баталгааг хангах, хөдөлмөрийн нөхцлийг сайжруулах зорилгоор ОУХБ, МҮЭ-ийн холбоо хамтарсан арга хэмжээний нэг юм.

1990-ээд оны дунд үед нийтийн тээврийн салбарын хүнд хэцүү байх үеэс 20 гаруй жил ард иргэдэд үйлчилж, олон мянган хүний ажил амьдралыг залгуулсан хувиараа тээвэр эрхлэгчид маань өнөөдөр ажлын байрны баталгаагүй, торгууль шийтгэлд өртөмтхий зэрэг олон бэрхшээл дунд явж байна. Үүнийг шийдвэрлэхийн тулд ҮЭ-ээс олон удаагийн жагсаал цуглаан, төрийн бүх шатныханд хандаж байгаа ч тодорхой шийдэлгүй өнөөдрийг хүрлээ. Бага, дунд оврын тээврийн хэрэгслийн хувь заяаг шийдэхэд өнөөдрийн хэлэлцүүлэг үр дүнгээ өгөх байх гэлээ.

Хөтөлбөрийн дагуу ҮЭ-ийн санал төслийг боловсруулсан зөвлөх, тээврийн инженер, эдийн засагч Ц.Пүрэвсамбуу “Нарантуул захад нийтийн тээврийн үйлчилгээ эрхэлж байгаа микроавтобусны жолооч нарын ажлын байр тээврийн шугамын эрхээ хадгалах, парк шинэчлэл зэрэг тулгамдсан асуудлыг шийдвэрлэх санал/төсөл”-ын дэлгэрэнгүй танилцуулгыг хийлээ.

Танилцуулгыг сонсоны дараа Зам тээвэр, хөгжлийн яам, Нийслэлийн нийтийн тээврийн үйлчилгээний газар, Улаанбаатар хотын хөгжлийн корпораци ХК-ийн холбогдох хүмүүс саналаа хэлж байр сууриа илэрхийлсэн юм.

ЗТХЯ-ны Авто тээврийн газрын дарга Е.Жаргалсайхан: Хувиараа тээвэр эрхлэгчдийн нөхцөл байдлыг мэдэж байна, энэ удаа ҮЭ-ийн зүгээс тодорхой санал төсөл боловсруулан танилцуулж байгаад талархаж байна. Хэлэлцээрийн нэг талын хувьд парк шинэчлэлтийн талаар та бүхний саналыг авч үзнэ гэсэн бол НТҮГ-ын Орлогч дарга Х.Булгаа буухиа үйлчилгээ буюу микроавтобусны чиглэлийг дэмжиж гэрээ байгуулан хамтран ажиллаж байгаа. Цаашид ч хамтран ажиллах бололцоотой гэлээ.

Оролцогч Хувиараа тээвэр эрхлэгчдийн ҮЭ-ийн нэгдсэн хорооны гишүүдийн зүгээс өнгөрсөн 24 жилийн хугацаанд нийслэлийн нийтийн тээвэрт хувийн хөрөнгөөр явсан ч одоо бол боломжгүй болсон. Жолооч нарт энэ үед нь туслах, асуудлыг нь төрийн бодлогоор дэмжин шийдвэрлэх нь зайлшгүй асуудлын нэг тул дэмжиж өгөхийг хүсье. Хөрөнгө оруулалтын талаар өмнө бас ҮЭ-ийн зүгээс олон санал гаргаж байсан хэрэв энэ удаагийн санал дэмжигдэхгүй орхигдвол ҮЭ-ийн зүгээс санал шаардлага гаргаж ажиллах болно гэдгээ бас илэрхийлж байлаа.

Хэлэлцүүлэгт нийт оролцогчид ҮЭ-ийн зүгээс саналаа оролцогч төрийн байгууллагуудад албан ёсоор хүргүүлэн, цаашид хамтран ажиллаж тодорхой шийдэлд хүрэх нь зүйтэй гэж үзсэнээр өндөрлөлөө.