Дундговь аймгаас улсын аварга малчин өрх дөрөв, улсын аварга саальчин нэг тодорлоо

Дундговь аймгийн Баянжаргалан сумын Энгэр-Ус багийн малчин Ишгэний Баттөмөр, Эрдэнэдалай сумын Цагаан овоо багийн малчин Цэгмидийн Мөнхбаяр, Цагаандэлгэр сумын Дэлгэрэх зам багийн малчин Батсуурийн Баянмөнх, Эрдэнэдалай сумын 3 дугаар багийн малчин Лхагвагийн Рашзэвгэ нар УЛСЫН АВАРГА МАЛЧИН ӨРХ, Гурвансайхан сумын Чулуут багийн саальчин Тавхайн Дулам УЛСЫН АВАРГА СААЛЬЧИН хэмээх эрхэм хүндтэй шагналын эзэд боллоо.

Говь сайхан нутгийнхаа өгөөж буяныг дэлгэрүүлж, өвөг дээдсээс өвөлсөн малч ухаан, нөр их хөдөлмөрийнхөө үр шимээр эрдэнэт мал сүргээ өсгөн үржүүлж, эх орныхоо хөгжил дэвшил, элгэн зоныхоо энх амьдралд эгэлгүй их хувь нэмрийг оруулж, төрдөө үнэлэгдэж, түмэндээ алдар цуугаа дуурсгасан улс, аймаг, сумын аварга малчид, саальчиддаа халуун баяр хүргэе.

УИХ-ын гишүүн Г.Мөнхцэцэг Дундговь аймгийн маань шилдэг бүтээгдэхүүний нэг болох “Агар брэнд”-ийн хувинг сонгож, улсын бүх аваргуудаа мялаасан, үндэсний үйлдвэрлэлээ дэмжигч З.Мэндсайхан сайддаа болон ХХААХҮЯ-ны хамт олонд чин сэтгэлийн талархал илэрхийллээ.

Сэтгүүлч

Сэтгүүлч Ц.Соёлмаа soyolmaa@vip76.mn