Зуунмод-Хөшигийн хөндийн шинэ нисэх онгоцны буудал чиглэлийн 8.4 км авто замын барилгын ажил эхэллээ.

Нээлтийн үйл ажиллагаанд УИХ-ын гишүүн Ж.Батжаргал оролцлоо.
Энэхүү авто зам нь Төв аймагт хийгдэж буй томоохон бүтээн байгуулалтын ажлууд “Шинэ Зуунмод” хот болон Хөшигийн хөндийн шинэ нисэх онгоцны буудал, үйлдвэр технологийн парк, эдийн засгийн чөлөөт бүс, түүнийг дагасан дэд бүтэц төмөр зам, тээвэр логистикийн төвтэй Зуунмод хотыг шууд холбох эдийн засаг, нийгмийн ач холбогдолтой бүтээн байгуулалтын ажил болох юм.

Мөн Зуунмод хотод хийгдэж байгаа Манзуширын хийдийн түүхэн дурсгалт газрыг түшиглэсэн соёл, шашин, аялал жуулчлалын цогцолбор болон Монголын үндэсний археологи, палеонтологи, угсаатны музейтэй холбоотой гадаад, дотоодын жуулчдын урсгалыг нэмэгдүүлж, үйлдвэрлэл, үйлчилгээний салбаруудын үйл ажиллагаа идэвхжин тэлж, улмаар орон нутгийн хөгжил, иргэдийн амьдралын чанарыг дээшлүүлэх нөхцлийг бүрдүүлнэ.

Уг авто замын зураг төслийг 2017 онд санаачлан орон нутгийн хөрөнгө оруулалтаар хийсэн бөгөөд хөдөлгөөний 2 зурвас бүхий 7 метр зорчих хэсгийн өргөнтэй, явган хүний болон дугуйн зам, ногоон байгууламж, гэрэлтүүлгийн ажлууд хийгдэхээрээ онцлог юм.

Авто замын барилгын ажлыг улсын төсвийн 8,1 тэрбум төгрөгийн хөрөнгө оруулалтаар Анандын зам ХХК хийж гүйцэтгэхээр шалгарсан бөгөөд энэ оны 10 сард багтаан ашиглалтад хүлээлгэж өгөхөөр ажлаа эхлүүлж байна.

Хатуу хучилттай автозамын бүтээн байгуулалтын ажил эхэллээ

Хатуу хучилттай автозамын бүтээн байгуулалтын ажил эхэллээ