Монгол Улсад эмийн хяналт шалгалтыг сайжруулах, үр дүнтэй болгох талаарх саналыг Улсын Их Хуралд танилцуулах үүрэг бүхий Хянан шалгах түр хороо”-ны ээлжит хуралдаан боллоо.

Хуралдаанаар “Эм, эмнэлгийн хэрэгслийн чанар, аюулгүй байдал”-ын талаарх Эм, эмнэлгийн хэрэгслийн хяналт зохицуулалтын газрын дарга Д.Нарантуяагийн мэдээллийг сонслоо.

Тэрбээр мэдээлэлдээ, 2022 оны 10 дугаар сарын 5-ны өдрийн байдлаар Монгол Улсын эмийн бүртгэлд нийт 4310 эм бүртгэлтэй байна. Нийт эмийн 21 хувь нь үндэсний, 79 хувь нь импортынх гэлээ.

Мөн хууль эрх зүйн орчин дутагдалтай, эмийн нөөц ханган нийлүүлэх байгууллагуудаас бүрэн хамааралтай байгаа, цахим тогтолцоо бүрдээгүй, лабораторийн тоног төхөөрөмж, хүний нөөцийн дутагдалтай байгаа зэрэг тулгамдсан асуудлуудыг ярилцлаа.

Хуралдаанаар тус газрын Эм шинжлэх лабораторийн эрхлэгч Ш.Энхзаяагийн мэдээллийг сонссон.

Лабораторийн шинжилгээний үзүүлэлт, шинжилгээний аргыг зарим улс оронтой харьцуулан авч үзэхэд үзүүлэлт бүрэн, харин шинжилгээний арга 3-6 төрлөөр хийх боломжгүй байгаа нь тоног төхөөрөмжийн эвдрэл, шаардлагатай урвалж бодисын хангамжаас шалтгаалж байгааг тэрээр хэлэв. Хянан шалгах түр хорооны гишүүд тус лабораторийн үйл ажиллагаатай ирэх долоо хоногт танилцахаар боллоо.

“Эм, эмнэлгийн хэрэгслийн чанар, аюулгүй байдал”-ын талаарх мэдээллийг сонслоо