2023.05.19

Ц.Даваасүрэн: Ард иргэдийн элчийн хувьд Үндсэн хуулийн өөрчлөлтийг дэмжихгүй!

Монгол Улсын Үндсэн хуульд нэмэлт өөрчлөлт оруулах асуудлаар УИХ-ын гишүүд тойрогтоо ажиллаж, ард иргэдийн санал, бодлыг хүлээн авсан.

УИХ-ын гишүүн Цэрэнпилийн Даваасүрэнгийн хувьд Үндсэн хуульд өөрчлөлт оруулахыг хүчтэй эсэргүүцэж, өөрийн байр сууриа чуулганы танхимд хатуу хэлдэг билээ. Тэрээр энэ удаагийн Үндсэн хуульд оруулах нэмэлт өөрчлөлтийг мөн дэмжихгүй гэдгээ илэрхийлээд байна.

Тодруулбал 2019 онд УИХ Үндсэн хуульд өөрчлөлт оруулж, мөн өнгөрсөн 2022 оны наймдугаар сард “Давхар дээл”-ийн хязгаарыг Үндсэн хуулиас хассан. Гэтэл хаврын чуулганаар дахин өөрчлөлт оруулахаар хуулийн төслийг Их Хуралд оруулж ирснийг тэрээр шүүмжиллээ. Гуравхан жилийн хугацаанд гурав дахиа өөрчлөлт оруулах гэж байгааг хүлээж авахгүй гэв.

Тэрээр тойрогтоо ажиллаж, ард иргэдийн санал, бодлыг сонссоноо УИХ-ын 2023.05.19-ний өдрийн чуулганы хуралдаанаар Монгол Улсын Үндсэн хуульд оруулах өөрчлөлтийн төслийг хэлэлцэх үеэр тайлагналаа.

Ингэхдээ “Гишүүдийн тоог нэмэгдүүлэхийг дэмжиж буй хүн алга аа. Нэгээр ч нэмэх хэрэггүй гэсэн саналыг хэлж байна. Намын жагсаалтыг мөн дэмжихгүй. 2012 оны сонгуульд тойроггүй 28 гишүүн байсан. Тэд улсын хөгжил ярьж байгаагүй, та нараас ялгаагүй, намууд төлөвшөөд сайжирсан зүйл тэр үед байгаагүй. Иймд бид намыг жагсаалтыг маш сайн мэднэ гэж ард, иргэд хэлсэн.

Бид иргэд, сонгогчдын төлөөлөл. Ард түмнийхээ элчийн хувьд гэж тангараг өргөсөн. Одоо та бүгд тангаргаа санаарай! Ард түмнийхээ элчийн хувьд нийт иргэний ашиг, сонирхлыг эрхэмлэн, Монгол Улсын Үндсэн хуулийг дээдлэн сахихаа чин шударгаар тангараглая гэж тангараг өргөсөн. Тиймээс миний бие олон түмнийхээ элч болсны хувьд тэдний саналыг дагана. Иймд Үндсэн хуулийн өөрчлөлтийг дэмжихгүй. Яагаад гэвэл би ард түмнийхээ төлөөллийн үүргийг гүйцэтгэж байгаа хэмээв.”

Түүнчлэн "Үндсэн хууль" бол төрийн дээд эрх мэдлийг эрэмбэлж, тогтоож байгаа дээд эрэмбэ, хязгаар. Хуульд өөрчлөлт ороход төрийн эрх мэдэл хуваарилагдаж байдаг. Үндсэн хуулийн гуравдугаар зүйлд засгийн бүх эрх ард түмний мэдэлд байна гэж заасан. 

УИХ Үндсэн хуулийн өөрчлөлтийг хүчээр шийдлээ гэхэд сонгуулийн үр дүн ямар байхыг хэлж мэдэхгүй байна.

Үр дагавар ямар асуудал үүсгэхийг хэлж мэдэхгүй. Тиймээс үүн дээр анхааралтай хандах хэрэгтэй. Ард нийтийн санал асуулга явуулж үүний дагуу шийдэх нь зөв гээд эцэст нь гишүүдэд хандаж өргөсөн тангарагтаа үнэнч байгаарай гэв.