УИХ-ын гишүүн С.Ганбаатар "Цахилгаан дулаан, эрчим хүчний үнийг үндэслэлгүй өсгөсөн Засгийн Газарт хариуцлага тооцох" талаар мэдээлэл хийлээ.

Тэрээр цахилгаан, дулааны үнийг УИХ-ын баталсан тарифаас илүү нэмсэн байгаа учраас Эрчим хүчний яам, Эрчим хүчний зохицуулах хороонд албан бичиг хүргүүлж гуравдугаар сарын 1-ний дотор хариу ирүүлэхийг шаарджээ. Мөн аж ахуйн нэгж, өрхийн бизнес эрхлэгчдээс цахилгаан, дулааны үнийг их хэмжээгээр нэмсэн талаарх мэдээллийг УИХ-ын Аж үйлдвэржилтийн байнгын хороонд хүлээн авна гэдгээ хэлсэн юм. Хэрвээ УИХ-ын баталсан хэмжээнд үнэ тарифын нэмэгдлийг мөрдөхгүй бол салбарын сайдад хариуцлага тооцно гэлээ.
Тэрээр “Би 15 аймагт очиж иргэдтэй уулзлаа. Цахилгаан, дулааны үнэ хэрээс хэтэрсэн нэмэгдсэн байна. Энэ нь ард иргэдийн амьжиргаанд асар их нөлөөлж байна. Тэр дундаа аж ахуйн нэгж, жижиг дунд үйлдвэрлэгч нарт нөлөөлж байна. Өрхийн аж ахуй эрхлэгчид хаалгаа хаах хэмжээнд хүрсэн байна. Ажилгүйдэл, үнийн хөөрөгдөлд онцгой нөлөөлж байна.
Тиймээс Эрчим хүчний зохицуулах хороо, Эрчим хүчний яам, Эрчим хүчний үндэсний хороонд албан бичиг явууллаа. Цахилгааны үнийг УИХ-аар баталсан тарифаас нэмэгдүүлж байгааг яаралтай таслан зогсоох, хэрвээ ингэсэн тохиолдолд холбогдох газруудад хариуцлага тооцохоос өөр аргагүй. УИХ дээр эрчим хүч, дулааны асуудлыг хэлэлцэхэд би 7 удаан мэдэгдэл хийж эсэргүүцэж байсан. Иргэд Үндсэн хуулиар эрүүл аюулгүй орчинд амьдрах, дулаан хоног хэрэгтэй. Гэтэл Эрчим хүчний яам, Эрчим хүчний зохицуулах хороо яаралтай арга хэмжээ авч үндэслэлгүйгээр нэмсэн тариф байгаа бол гуравдугаар сарын 1-ний дотор мэдэгдэх ёстой гэсэн байр сууриа бичгээр илэрхийллээ. УИХ-ын Аж үйлдвэржилтийн байнгын хороонд аж ахуйн нэгжүүд, өрхийн бизнес эрхлэгчид, ЖДҮ эрхлэгчид үндэслэлгүйгээр цахилгаан, дулааны үнэ нэмсэн талаар мэдээлэл өгнө үү” гэлээ.

С.Ганбаатар: Цахилгааны үнийг УИХ-аар баталсан хэмжээнд нэмэхгүй бол Эрчим хүчний сайдад хариуцлага тооцно