Өчигдөр /2025.03.17/ Улсын Их Хурлын 2025 оны хаврын ээлжит чуулган нээлтээ хийж, намын бүлгүүд хуралдлаа. МАН-ын бүлгийн хуралд Сангийн сайдын цаг үеийн мэдээллийг сонссоны дараа УИХ-ын гишүүн А.Ариунзаяа Хөдөлмөрийн хөлсний доод хэмжээг нэмэгдүүлсэн шийдвэрээ эргэн харах шаардлагын талаар саналаа илэрхийлсэн юм. 

Ингэхдээ энэ оны 4 дүгээр сарын 1-ний өдрөөс эхлэн Хөдөлмөрийн хөлсний доод хэмжээг нэмэгдүүлсэн шийдвэрээр дан ганц цалин хөлсний асуудал бус, харин түүнтэй уялдсан олон төлбөр хураамж нэмэгдэх талаар санууллаа. Сайн дурын нийгмийн даатгалын шимтгэл, Нийгмийн даатгалын шимтгэл төлөх дээд хэмжээ, Эрүүл мэндийн даатгалын шимтгэл, Гадаад ажиллах хүчний төлбөр, Хөгжлийн бэрхшээлтэй иргэн ажлуулаагүйн төлбөр зэрэг иргэд, аж ахуйн нэгжид ирэх санхүүгийн ачааллын талаар дахин санууллаа.

А.Ариунзаяа "Бүлгийн ямар нэгэн шийдвэр албан ёсоор гараагүй хэдий ч Ерөнхий сайд, намын даргын хувьд Л.Оюун-Эрдэнэ иргэд, аж ахуйн нэгжид нэмэлт санхүүгийн ачаалал гаргахгүй байх улс төрийн шийдвэр дагахыг дахин баталгаажуулж байр сууриа илэрхийлсэн. Хөдөлмөр нийгмийн зөвшлийн гурван талт Үндэсний хороо шийдвэрээ эргэн харах шаардлага үүссэн гэж үзэж байна. Хуулиа сайн харвал хоёр жилд нэг удаа тогтоох, аливаа жилийн 1 сарын 1-нээс мөрдөх зэргийг харгалзвал зохих юм. Тус хуулиар эдийн засаг, нийгмийн хүндрэлийн үед түр хойшлуулах боломж нь ч нээлттэй. Ямар ч байсан байр сууриа дахин илэрхийлсэн. Хөдөлмөрийн хөлсний доод хэмжээг дан ганц цалин хөлстэй холбож ойлгох нь буруу бөгөөд иргэд, аж ахуйн нэгжид ирэх санхүүгийн ачааллыг бодолцох нь зүйтэй" гэлээ.