Ерөнхий сайд Н.Алтанхуягийн БНХАУ-д хийсэн албан ёсны айлчлалын үр дүн, хоёр орны Ерөнхий сайд нарын хэлэлцээрээр шийдсэн асуудал, түүний мөрөөр хоёр талын холбогдох байгууллагуудын хооронд байгуулсан 12 баримт бичгийн ач холбогдлын талаар багц мэдээлэл хүргэж байна.

Нүүрс хийжүүлэх үйлдвэр байгуулж, хийн түлш экспортолно

Ерөнхий сайд Н.Алтанхуяг, БНХАУ-ын Төрийн зөвлөлийн Ерөнхий сайд Ли Көцян нарын хэлэлцээ болон айлчлалын үеэр Засгийн газрын тэргүүнүүдийн баталсан "Монгол Улс, БНХАУ-ын хооронд Стратегийн түншлэлийн харилцааг хөгжүүлэх дунд, урт хугацааны хөтөлбөр"-ийг үндэслэн уул уурхай, газрын тосны салбарт хоёр санамж бичигт гарын үсэг зурсан юм. Нүүрс хийжүүлэх үйлдвэр байгуулж, хийн түлш үйлдвэрлэн экспортлох, Монголд нийлүүлэх газрын тосны бүтээгдэхүүний хэмжээг нэмэгдүүлэхэд чиглэсэн хамтын ажиллагааг дээрх баримт бичгүүдээр тодорхойлсон.

Монголын хүрэн нүүрсний ордыг түшиглэн шатах хийн үйлдвэр байгуулж, уг үйлдвэрийн бүтээгдэхүүнээр дотоодын хэрэгцээг хангах, улмаар Хятадын зах зээлд борлуулахад Хятадын Газрын тос, химийн "Синопек групп” корпорацитай хамтран ажиллана. Энэ үйлдвэр эхний ээлжинд жилд 15 тэрбум шоо дөрвөлжин метр хэмжээний шатах хий үйлдвэрлэх хүчин чадалтай байхаар урьдчилсан байдлаар төсөөлж байна. Энэ хэмжээний шатах хий үйлдвэрлэхэд жилдээ 50 орчим сая тонн хүрэн нүүрс ашиглагдана. Өнөөдрийн ханшаар 1 тэрбум орчим ам.долларын үнэ бүхий хүрэн нүүрс олборлох шууд үр ашгаас гадна 20 мянга орчим хүн ажлын байраар хангагдана. Монгол Улс хүрэн нүүрсний арвин нөөцөө ийнхүү гүн боловсруулан ашигласнаар байгаль орчинд ээлтэй эрчим хүчний эх үүсвэр бий болгох, химийн болон шатахууны үйлдвэрийн үндэс суурь тавихад чухал ач холбогдол өгнө.

20 жилийн хугацаанд нэг тэрбум хүртэл тонн нүүрс Хятадад нийлүүлнэ

Монголын нүүрс экспортлогчдыг төлөөлж Эрдэнэс Тавантолгой ХК, Энержи ресурс ХХК, Тавантолгой ХК, Хятадын Шенхуа Энержи компанитай 20 жилийн хугацаанд Хятадад нэг тэрбум хүртэл тонн нүүрс нийлүүлэхээр айлчлалын үеэр Харилцан ойлголцлын санамж бичигт гарын үсэг зурсан. Олборлолт, үйлдвэрлэлийн хүчин чадалтай уялдуулан төлөвлөгөө гаргах, олон улсын зах зээлд худалдаалах боломжийг хамтран судлахаар тохиролцсон юм.

Дээрх нүүрсийг өнөөгийн ханшаар тооцож үзэхэд жилд 50 шахам тэрбум ам.долларын борлуулалт болно. Ингэснээр урт хугацаанд Тавантолгойн бүлэг ордоос олборлох нүүрсийг тээвэр, ложистикийн болон зах зээлийн өргөн боломж бүхий түнштэй хамтран борлуулах аятай нөхцөл бүрдэнэ.

Монгол Улсад үйл ажиллагаа явуулж буй нүүрсний бусад уурхай, тухайбал МАК ХХК, Саусгови Сандс ХХК зэрэг 10-аад компани ирэх 20 жилд мөн 1 тэрбум орчим тонн нүүрс экспортлох боломж байгааг Уул уурхайн яам тооцож гаргасан бөгөөд зорилтот зах зээлийн судалгааг хийж байна.

“Монгол-93” шатахууны нийлүүлэлтийг 4 дахин нэмнэ

Монголд олборлож буй түүхий тосны хэмжээ цаашид жил бүр өснө. Үүнтэй уялдуулан Хятадаас нийлүүлэх шатахууны хэмжээг нэмэхээр УУЯ-ны Газрын тосны газар, Хятадын “Петрочайна интернэйшнл” компанийн хооронд санамж бичиг байгуулсан.

Монгол Улс өөрийн олборлосон түүхий тосоо МГЛ-93 автобензин болгоод, сард 10 мянган тонн хүртэл хэмжээгээр урд хөршөөс татан авахаар тохирсон байдаг

Монгол Улс өөрийн олборлосон түүхий тосоо МГЛ-93 автобензин болгоод, сард 10 мянган тонн хүртэл хэмжээгээр урд хөршөөс татан авахаар тохирсон байдаг. Замын-Үүд өртөөн дэх шингэн түлш шилжүүлэн ачих төхөөрөмжийн өргөтгөл ирэх сарын дундуур дуусах учраас дотоодын эрэлттэй уялдуулан урд хөршөөс авах шатахууны хэмжээг нэмэхээр тохиролцлоо.  Тус байгууламж бүрэн хүчин чадлаараа ажиллавал сард 35-40 мянган тонн шингэн түлш шилжүүлэн ачих болно. Шатахууны нийлүүлэлтийг ийнхүү нэмснээр дотоодын өсөн нэмэгдэж буй эрэлт хэрэгцээг олон эх үүсвэрээс хангах, нийлүүлэлтийг тогтворжуулах, жижиглэнгийн худалдааны үнийн өсөлтийг зохицуулах зэрэг арга хэмжээ авах бололцоотой болно.

Хятадын тал ачаа тээврийн боомтын төмөр зам барьж манайд хүлээлгэж өгнө

Хилийн төмөр зам барих асуудлаар хамтран ажиллахаар Ерөнхий сайдын айлчлалын үеэр Харилцан ойлголцлын хоёр санамж бичигт гарын үсэг зурсан юм. БНХАУ-ын төрийн өмчит “Шэнхуа групп корпораци”, “Эрдэнэс Тавантолгой” ХК, “Энержи Ресурс” ХХК, “Тавантолгой” ХК-ийн төлөөлөл бүхий консорциум болон “Монголын төмөр зам” ТӨХК-иуд энэ ажилд хамтран оролцоно.

Санамж бичгийн хүрээнд “Шэнхуа групп”-ээр ахлуулсан консерциум Монгол Улсын хилийн Гашуун сухайт боомтын өртөөг Хятадын Ганц модны хилийн боомттой холбосон ачаа тээврийн боомтын төмөр зам барьж “Монголын төмөр зам” ТӨХК-д хүлээлгэн өгөх юм. Энэ дагуу Сүхбаатар аймагт нэг, Дорноговь аймагт нэг, Өмнөговь аймгаар хоёр боомт нэмэгдэнэ. 

Хилийн бүсэд нисэхийн эрэн хайх, авран туслах ажиллагааг хамтран хэрэгжүүлнэ

“Иргэний агаарын хөлгийг эрэн хайх, авран туслах ажиллагааг зохицуулах тухай” хоёр орны Засгийн газар хоорондын хэлэлцээрт Монголын талаас Зам, тээврийн сайд А.Гансүх, БНХАУ-ын талаас Иргэний нисэхийн захиргааны дарга Ли Жиа Шиан /Li Jia Xiang/ нар гарын үсэг зурсан юм.

Нисэхийн эрэн хайх, авран туслах үйлчилгээнд хөрш орнуудтайгаа хамтран ажиллахыг олон улсын иргэний нисэхийн тухай гэрээ, конвенциудад зарчим болгодог.

Үүнийг хэрэгжүүлэх үүднээс Монгол, ОХУ-ын Засгийн газар хооронд нисэхийн эрэн хайх, авран туслах салбарт хамтран ажиллах хэлэлцээрийг 2006 онд байгуулж байв. Харин БНХАУ-ын талтай энэ салбарт хамтран ажиллах хэлэлцээр Хятадын талаас шалтгаалан удаашралтай байсаар ирсэн бол Ерөнхий сайдын энэ удаагийн айлчлалаар эцэслэн батлагдлаа.

Хэлэлцээр байгуулснаар хилийн залгаа нутаг дэвсгэр, агаарын зайд аюулд нэрвэгдсэн, аюул тулгарсан агаарын хөлөг, хүнд үндэсний харъяалал,нийгмийн байдал, илрүүлсэн нөхцөл байдлыг үл харгалзан богино хугацаанд тусламж үзүүлэх эрх зүйн зохицуулалттай болж байгаа юм. Түүнчлэн, иргэний нисэхийн олон улсын байгууллагын (ICAO) стандарт, зөвлөмжийг хоёр тал нэгдсэн зохицуулалттай хэрэгжүүлнэ.

Хятад улсаас Монголд 50 сая юанийн буцалтгүй тусламж үзүүлнэ

Ерөнхий сайдын БНХАУ-д хийсэн айлчлалын үеэр

Айлчлалын хүрээнд "Эдийн засаг, техникийн хамтын ажиллагааны тухай Монгол Улсын Засгийн газар, БНХАУ-ын Засгийн газар хоорондын хэлэлцээр"-т Эдийн засгийн хөгжлийн сайд Н.Батбаяр гарын үсэг зурсан. Энэ хэлэлцээрийн дагуу Хятад улсаас манай улсад 50 сая юанийн буцалтгүй тусламж үзүүлэх ба энэ хөрөнгийг хоёр улсын Засгийн газар хоорондын тохиролцсон төслүүдийн санхүүжилтэд зарцуулна. 

Гамшгаас хамгаалах салбарын хамтын ажиллагаа өргөжлөө

Ерөнхий сайд Н.Алтанхуягийн БНХАУ-д хийсэн ажлын айлчлалын хүрээнд хоёр улсын гамшгаас хамгаалах салбарын харилцаа, хамтын ажиллагааг өргөжүүлэхэд чухал үр дүн гарлаа. Айлчлалын үеэр “Гамшгаас хамгаалах салбарт хамтран ажиллах тухай Монгол Улсын Онцгой байдлын ерөнхий газар, БНХАУ-ын Иргэний хэргийн яам хоорондын харилцан ойлголцлын санамж бичиг”-т ОБЕГ-ын дарга Т.Дуламдорж гарын үсэг зурж баталгаажуулсан юм.

Томоохон байгалийн гамшиг тохиолдсон үед хүн хүч, эд материалын яаралтай тусламж үзүүлэх, авран туслах, гамшгийн хор уршгийг арилгах үйл ажиллагааны туршлагаас солилцох, сансрын технологийг түймрийн мониторинг, гамшгаас урьдчилан сэргийлэх, мэдээлэх үйл явцад ашиглах, гамшиг судлалын талаар хамтарсан шинжилгээ, судалгааны ажил хийх, урт, богино хугацааны сургалтуудад манай улсын онцгой байдлын байгууллагын албан хаагчдыг сургаж бэлтгэх зэрэг чиглэлээр хамтран ажиллахаар тохиролцлоо.

Айлчлалын үеэр мөн ОБЕГ-ын дарга, онцгой байдлын хурандаа Т.Дуламдорж БНХАУ-ын Иргэний хэргийн сайд Ли Ли Гуотой уулзаж, санамж бичгийн хүрээн дэх хамтын ажиллагааны асуудлуудаар санал солилцсон юм.

Монголд анхны шинжлэх ухааны парк байгуулна

Айлчлалын хүрээнд боловсрол, соёлын салбарт чухал алхмууд хийгдлээ. “Монгол Улсын Боловсрол, шинжлэх ухааны яам, БНХАУ-ын Шинжлэх ухаан, технологийн яам хоорондын харилцан ойлголцлын санамж бичиг"-т манай талаас БШУ-ны дэд сайд Б.Ургамалцэцэг, Хятадын талаас Шинжлэх ухаан, технологийн дэд сайд Ван Жиганнар гарын үсэг зурсан.

Монголд анхны шинжлэх ухааны парк байгуулж, хөгжүүлэхэд туршлага судлах, хамтарсан төсөл хөтөлбөрүүд хэрэгжүүлэх, оюутан болон эрдэмтэн солилцоог дэмжих, хоёр талын шинжлэх ухаан, технологи, инновацийн хамтын ажиллагааг гүнзгийрүүлэхэд энэ хамтын ажиллагаа чиглэнэ.

Солилцооны тухайд, хоёр улсын Засгийн газар хоорондын хэлэлцээний дагуу одоо жилд 300 оюутанг өмнөд хөршид сургадаг бол энэ тоог гурав дахин нэмэхээр болсон. Ингэснээр таван жилийн хугацаанд жилд 1000 оюутанг төрийн тэтгэлгээр сургахаар болж байгаа нь залууст таатай боломж олгох чухал алхам боллоо.