Засгийн газрын ээлжит хуралдааныг маргааш 16.00 цагт зарлаад байна. Оны төгсгөл болж байгаа тул Засгийн газар хэлэлцэх асуудлаа шахаж буй бололтой, нийтдээ 34 асуудлыг хэлэлцэн шийдвэрлэх бол 10 шахам асуудалтай танилцахаар төлөвлөжээ.

Тухайлбал, Монгол Улсын Ерөнхийлөгчийн санаачилсан Улс төрийн намын тухай хуулийн төслийг хэлэлцэх юм байна. Мөн нууц асуудал багтжээ. Энэ нь батлан хамгаалах салбартай хамааралтай аж.

Тэгвэл Аж үйлдвэрийн сайд Д.Эрдэнэбат “Монцемент үйлдвэр” төслийн хөрөнгө оруулалтын гэрээний талаар мэдээлэл өгөх бол Хөдөлмөрийн сайд Г.Баярсайхан нэр бүхий хуулийн төслийг эргүүлэн татах болсон тухай мэдээлэл өгөх аж. Энэ нь Хөдөлмөрийн хуулийн шинэчилсэн найруулгын төсөл байх магадлалтай. Учир нь энэхүү төслөөр УИХ дахь Ардчилсан намын бүлэг чуулганы нэгдсэн хуралдаанаас завсарлага авсан байгаа бөгөөд Засгийн газарт төслийг татан авах чиглэл өгөх болохоо УИХ-ын дарга мэдэгдсэн юм.