УИХ-ын гишүүн О.Баасанхүү өнөөдөр /2018.08.03/ мэдээлэл хийлээ. Тэрбээр “Эрдэнэт” үйлдвэрийн 51 хувьтай холбоотой асуудлаар Ерөнхий сайд У.Хүрэлсүхэд асуулга тавьж байгаа юм байна.

Асуулга нь: Английн Лондон хотод өнгөрсөн долдугаар сард болсон арбитрын шүүх хурлаар “Эрдэнэт” үйлдвэрийн асуудал бүрэн эцэслэгдсэн эсэх. Хоёрт, “Эрдэнэт” үйлдвэрийн удирдлагууд болон компанийн өмч хөрөнгө, үйл ажиллагаатай холбоотой ямар шийдвэр тус шүүхээс гаргасан. Гуравт, “Эрдэнэт” үйлдвэрийн 51 хувийг барьцаанд тавьсан этгээдүүдэд ямар арга хэмжээ авах талаар. Дөрөвт, “Эрдэнэт” үйлдвэрийг хохиролгүй болгох төлөвлөгөөний талаар мэдээлэл авахыг хүссэн байна.

Өнгөрсөн дөрөвдүгээр сард “Эрдэнэт” үйлдвэрийн 51 хувьтай холбоотой асуудлыг судлах УИХ-ын ажлын хэсэг байгуулагдсан. Энэ ажлын хэсгийн ахлагчаар УИХ-ын гишүүн Я.Санжмятав, дэд ахлагчаар УИХ-ын гишүүн Т.Аюурсайхан томилогдсон аж. Ингээд УИХ-ын хаврын чуулган завсарлахын өмнө УИХ-ын гишүүн О.Баасанхүү  ажлын хэсгээс явц байдлыг нь тодруулжээ. Ингэхэд ажлын хэсгийн ахлагч УИХ-ын гишүүн Я.Санжмятав” Ирэх долдугаар сарын 6-нд Английн Лондон хотод арбитрын шүүх хурал болох гэж байгаа. Энэ шүүх хуралд ажлын хэсгийн гишүүн Т.Аюурсайхан оролцоно. Шүүх хурлын шийдвэр нааштай гарна” гэдэг тайлбарыг өгчээ. Гэтэл арбитрын шүүх хурлын шийдвэр Монгол Улсад таагүй гарсан гэж О.Баасанхүү гишүүний танилууд түүнд дуулгажээ. Арбитрын шүүхээс таагүй шийдвэр гарсан тул “Эрдэнэт” үйлдвэрийн удирдлагуудыг хаа байгаа газраас нь саатуулах, тус үйлдвэрийн өмч хөрөнгийг нь хураах нөхцөл байдал үүсч болзошгүйг О.Баасанхүү гишүүн анхаарууллаа. Иймд Ерөнхий сайдад асуулга тавьж байгаа аж.

Т.НОМИН