МҮЭ-ийн холбооны гишүүн болон харьяа байгууллагын хамт олон, нийт ҮЭ-ийн гишүүд, идэвхтэн, сонгуультан, иргэд, хөдөлмөрчид та бүхэндээ угтан ирж буй 2019 оны шинэ жилийн баярын халуун мэндийг өргөн дэвшүүлье.

Улиран одож буй 2018 он бид бүхний хувьд МҮЭ-ийн хөдөлгөөний 100 жилийн ой, МҮЭ-ийн XXII их хурлын дараах ажил хөдөлмөрөө үнэлэн дүгнэж, шинэ зорилго, зорилт, ажлын төлөвлөгөөг эхлүүлсэн хариуцлагатай олон чухал ажлыг хамтын хүчээр амжилттай хэрэгжүүлсэн онцлог жил болон түүхийн хуудсанд үлдэж байна. Өнгөрч буй 2018 он Монголын ҮЭ-ийн хөдөлгөөний хувьд гишүүдийнхээ нийтлэг эрх ашгийн төлөөх тэмцлийн жил болж, эдийн засаг хүнд үед ард иргэдийнхээ нуруун дээрх ачааг бага ч болов хөнгөлөх зорилго, тэмүүллээр дүүрэн жил болж өнгөрлөө. Хамтын тэмцэл, эв нэгдэл бидэнд амжилт, урам зориг, туршлага болон үлдэж байгааг баяртайгаар тэмдэглэхийг хүсэж байна.

Улс орны улс төр, нийгмийн нөхцөл байдал гацаанд орсон, эдийн засаг төдийлөн сайжраагүй цаашид энэхүү байдал нь ард иргэдэд хэрхэн нөлөөлөх нь тодорхойгүй цаг үе биднийг угтаж байна. Тиймээс ирж буй 2019 он бид бүхнээс илүү өндөр хариуцлагыг шаардсан жил байх болно.

Улс орны эдийн засагт тохиогоод буй хүндрэлийг даван туулахын төлөө монгол хүн бүр нэгэн зорилго, нэгдмэл хүчээр хамтран зүтгэх учиртай. МҮЭ-ийн нийт гишүүдийн зүгээс ҮЭ-ийн байгууллага болон гишүүн бүрийн идэвхтэй оролцоог ханган, эв нэгдэлтэй ажиллаж чадвал энэхүү төвөгтэй нөхцөл байдлаас гарах нэгэн арга зам болох билээ.

Монгол айл өрх бүрийн амьдрал хангалуун, шинэ ондоо аз жаргал, инээд хөөрөөр дүүрэн байж, шинэ он бид бүхэнд амжилт бүхний дээдийг авчрах болтугай. Хүн бүр эрүүл энх жаргаж, эх орны минь маргааш улам өнгөлөг гэгээлэг болж, монгол хүн бүрийн хийморь золбоо бадрахын өлзийт ерөөлийг өргөн барья.

МОНГОЛЫН ҮЙЛДВЭРЧНИЙ ЭВЛЭЛИЙН ХОЛБООНЫ ЕРӨНХИЙЛӨГЧ Х.АМГАЛАНБААТАР

МҮЭХ-ны Ерөнхийлөгч Х.Амгаланбаатар мэндчилгээ дэвшүүллээ