Улсын Их Хурлын Төсвийн байнгын хорооны өнөөдрийн (2019.10.02) хуралдаан гишүүдийн 52,6 хувийн ирцтэй эхэлж, Монгол Улсын 2018 оны нэгдсэн төсвийн гүйцэтгэл, Засгийн газрын санхүүгийн нэгтгэсэн тайлан, “Монгол Улсын 2018 оны төсвийн гүйцэтгэлийг батлах тухай” Улсын Их Хурлын тогтоолын төслийн хоёр дахь хэлэлцүүлгийг хийлээ. Хуралдааныг Улсын Их Хурлын гишүүн Н.Амарзаяа даргалав. 

Монгол Улсын 2018 оны нэгдсэн төсвийн гүйцэтгэл, Засгийн газрын санхүүгийн нэгтгэсэн тайлангийн талаар Засгийн газрын гишүүн, Сангийн сайд Ч.Хүрэлбаатар, Төсвийн байнгын хорооны харьяа төсвийн ерөнхийлөн захирагчийн эрхлэх асуудлын хүрээний байгууллагуудын санхүүгийн нэгтгэсэн тайлан, төсвийн гүйцэтгэлд хийсэн аудитын дүгнэлтийн талаар Монгол Улсын Ерөнхий аудитор Д.Занданбат  нар тус тус танилцуулав.

Энэ үеэр УИХ-ын гишүүн Б.Баттөмөр

Төсвийн гүйцэтгэл ярьж байхад банкныхан баймаар байна. Мөнгөний бодлого яриагүй ч гэсэн энд байх хэрэгтэй. Өчигдөр чуулган дээр ч байгаагүй. Урсгал дансны алдагдал 2,2 тэрбум доллар болчихсон энэ ямар учиртай юм бэ? гэдэг дээр хариулт авч чадаагүй өнөөдөр ахиад асууя.

2018 оны төсвийн үр дүн маш сайн гарч байгаа. Маш авууштай зүйл нь янз бүрийн бонд гаргаагүй. Урьд нь төсөвтэй ижил хэмжээний бонд гаргадаг түүний хүүнд маш их хэмжээний мөнгө төлдөг ийм дутагдлууд байсан. Энэ 2018 онд байхгүй болсон.

Жил бүрийн төсвийн төлөвлөлтийг яаж хийж байна? Далд эдийн засаг байгаа. Дэлхийн нийтээрээ тооцдог энэ далд эдийн засгийг яаж тооцох вэ? Өнгөрсөн хугацаанд хийгдсэн эдийн засгийн шинэчлэлтүүдийн нэг нь НӨАТ-ын урамшуулал. Энэ шинэчлэлтийг цаашаа үргэлжлүүлэн боловсронгуй болгох дээр яаж анхаарч ажиллаж байгаа вэ?