Ерөнхий сайд У.Хүрэлсүх өнөөдөр /2020.05.26/ стартап бизнес эрхлэгч залуучуудын төлөөллийг Төрийн ордонд хүлээн авч уулзлаа.

Уулзалтад стартап бизнес эрхлэгчдийн “Dreamers” нэгдлийн залуус оролцсон юм. Энэ нэгдэлд 1500 орчим залуус, 500 орчим компани нэгдсэн байна.

Судалгаагаар залуучуудын 92 хувь нь өөрийн гэсэн бизнестэй болох хүсэл сонирхолтой байна гэдгээ илэрхийлсэн бөгөөд монгол залуучуудыг өөрийн шинэ санаагаа ажил болгож, хөгжүүлэх орчин нөхцлийг бүрдүүлж, дэлхий дахинд амжилттай болсон гарааны бизнесүүдийн жишгээр "өсгөх"-ийн тулд ийнхүү нэгдэл болон ажиллаж байгаа гэдгийг уулзалтад оролцож буй гарааны бизнес эрхлэгчдийн төлөөлөл хэллээ.

Ерөнхий сайд У.Хүрэлсүх "Шинэ үеийн ертөнц бий болж байна, тэдний төлөөлөл та бүхэнтэй уулзахад сайхан байна. Цахим шилжиллтэд технологийн компаниуд маш чухал. Тиймээс та бүхнийг дэмжинэ. 30 жил уул уурхайгаа ярьсан, ухсан. Одоо оюунаа ухъя. Манай залуус IQ-гаараа дэлхийд эхний 10-т багтаж байна. Тиймээс үүнийг ашиглаж, хөгжүүлэх нь туйлын чухал байна.

Монголын төр залуусыг дэмжихээс тушаа болж болохгүй. Хэн юу санаачилж байна, түүнд юу хэрэгтэй байна түүний төлөө Засгийн газар чадах чинээгээрээ туслах ёстой. Энэ бол Ерөнхий сайдын, Засгийн газрын бодлого. Хөрөнгө мөнгөний бололцоо дэлхийн бусад орон шиг биш ч боломжийн хэрээр дэмжин ажиллана” гэлээ.

У.Хүрэлсүх: 30 жил уул уурхайгаа ярьсан, ухсан. Одоо оюунаа ухъя