Хүрэлбаатар.Ч 2020.12.24 | Vip76.mn

Татварын алданги, торгуулиас тухайн албан татвар төлөгчийг нэг удаа чөлөөлнө

Татварын алданги, торгуулиас тухайн албан татвар төлөгчийг нэг удаа чөлөөлнө

УИХ-ын чуулганы өнөөдрийн \2020.12.24\ нэгдсэн хуралдаанаар Засгийн газраас 2020 оны 12 дугаар сарын 16-ны өдөр өргөн мэдүүлсэн Татварын алданги, торгуулиас чөлөөлөх тухай хуулийн төслийг хэлэлцлээ.

Хуулийн төслийг УИХ-ын гишүүн, Сангийн сайд Ч.Хүрэлбаатар танилцууллаа. 

ТБХ-ны санал дүгнэлтийг УИХ-ын гишүүн Х.Баделхан танилцуулав. 

Олон нийтийг хамарсан хөл хорио, хязгаарлалтын улмаас иргэд, аж ахуйн нэгжүүдийн бизнесийн үйл ажиллагаанд хүндрэл үүсэж, хуулиар ногдуулсан албан татварыг хуульд заасан хугацаанд төлөхөд хүндрэл үүсэхээр байна.

Улмаар эдгээр иргэд, аж ахуйн нэгжүүдэд их хэмжээний албан татварын өр төлбөр, алданги, торгууль хуримтлагдах нөхцөл байдал бий болох эрсдэлтэй байна. Иймээс үүсэж буй нөхцөл байдалтай холбогдуулан Татварын алданги, торгуулиас чөлөөлөх тухай хуулийн төслийг боловсруулжээ.

Энэ 2020 оны 9 дүгээр сарын 1-ний өдрөөс 2021 оны 7 дугаар сарын 1-ний өдрийг хүртэлх хугацаанд албан татвар төлөгчийн хуулийн дагуу ногдуулан тайлагнасан төлбөл зохих татварыг хуульд заасан хугацаанд төлөөгүй тохиолдолд уг хугацаанд ногдуулах татварын алданги, торгуулиас тухайн албан татвар төлөгчийг нэг удаа чөлөөлөхөөр хуулийн төсөлд тусгасан байна.