Монгол Улсын Засгийн газрын 2021 оны хоёрдугаар сарын 24-ний өдрийн ээлжит хуралдаанаар аймаг, сум, тосгон, багийн цэцэрлэг, ерөнхий боловсролын сургуулийн хичээл, сургалтын үйл ажиллагааг халдвар хамгааллын дэглэм баримтлан энэ оны гуравдугаар сарын 1-ний өдрөөс танхимаар эхлүүлэхээр шийдвэрлээд буй.

Үүнтэй холбоотойгоор холбогдох шийдвэрүүдийг танилцуулах, хэрэгжилтийг хангах цахим уулзалтыг БШУЯ-наас аймаг, сумдын Боловсрол, соёл, урлагийн газрын дарга, Цэцэрлэгийн эрхлэгч, арга зүйч, ЕБС-ийн захирал, сургалтын менежерүүдтэй яг одоо хийж байна.

Уулзалтын үеэр Боловсрол, Шинжлэх ухааны сайд Л.Энх-Амгалан "Хичээллээгүй байх үедээ мөнгөө түрүүлээд авчихсан их, дээд сургуулиуд сургалтын төлбөрийг дараагийн улиралд нь шилжүүлэх. Хичээл сонгох нэрийдлээр барьцуулж мөнгө авдаг асуудлыг болиулахаар ажлын хэсэг томилж, ажиллаж байна. Энэ нь тодорхой үр дүнд хүрнэ байх.

Өчигдөр ЖАЙКА-гийн төлөөлөгчтэй уулзаж 600 гаруй сургууль, 900 гаруй сургуулийн ариутгал халдваргүйтгэлийн талаарх гэрээнд гарын үсэг зурсан. Гуравдугаар сарын 1-нээс та бүхэнд шаардлагатай нэг хоёр удаагийн хэрэгцээний ариутгал халдваргүйтгэлийн зүйлсийг явуулна. Цаашид байгууллага бүхэн хоёр сая төгрөгт багтаагаад шаардлагатай хэрэгцээгээ шийдвэрлэх боломжтой гэж харж байна.

Мөн цар тахалтай холбоотойгоор боловсролын салбараас 170 тэрбум төгрөгийн төсвийг татсан гэдгийг эцэг эхчүүддээ ойлгуулахыг хүсье. Төгсөх ангийн хүүхдүүдийн давтан сургалт, хичээл нөхөлтөд анхаараарай. Давтан сургалтын асуудалд орон нутагт байгаа тэтгэвэр гараад 1-2 жил болсон багш нараа дайчилъя гэж бодож байгаа. Тодорхой санхүүжилтийн ямар эх үүсвэр байх талаар яаманд ажлын хэсэг гарч ажиллаж байна" хэмээн удирдлагуудад хандан байр сууриа илэрхийлэв.

Л.Энх-Амгалан: Давтан сургалтад тэтгэвэрт гараад 1-2 жил болсон багш нараа дайчлах төлөвлөгөөтэй байна