Сонгинохайрхан дүүргийн засаг дарга Н.Алтаншагай хичээлийн шинэ жилийн баярын мэнд дэвшүүллээ.

Эрхэм баян-эрдэм мэдлэгийг түгээн дэлгэрүүлэгч эрдэмтэн багш сурган хүмүүжүүлэгчид, ажилтан, албан хаагчид, оюутан, сурагчид, цэцэрлэгийн бяцхан хүүхдүүд, эцэг эхчүүд та бүхэндээ 2022-2023 оны хичээлийн шинэ жилийн мэнд хүргэе.

Энэ хичээлийн жилд Сонгинохайрхан дүүрэгт Ерөнхий боловсролын 35 сургуульд 66169 сурагч суралцах бол 114 цэцэрлэгийн 793 бүлэгт  29098 хүүхэд хамрагдаж байна. Мөн нэгдүгээр ангид 8254 сурагч элсэн орж эрдмийн их өргөөний алтан босгоор алхлаа.

Сонгинохайрхан дүүрэгт маань 2022 онд 320-640 хүүхдийн суудалтай сургуулийн 9 барилга, 2 өргөтгөл, 1 сургуулийг буулгаж шинээр барьж байгаа бол сургуулийн өмнө боловсролын хүртээмжийг нэмэгдүүлэх зорилтын хүрээнд 14 цэцэрлэг шинээр баригдаж, 5 цэцэрлэгт өргөтгөл хийгдэж, 1 цэцэрлэгийг буулган, барьж байгааг дуулгахад таатай байна.

Мөн 4 дүгээр хороонд улсын төсвийн хөрөнгөөр 162 дугаар ерөнхий боловсролын сургууль шинээр ашиглалтад орж байна.

Энэхүү сэтгэл догдлуулсан сайхан өдрийг эцэг, эхчүүд, сурагч дүү нар болон хүндэт багш нар маань тэсэн ядан хүлээсэн гэдэгт итгэлтэй байна. Та бүхний эрдмийн их үйлсэд амжилт хүсэн, ирээдүйн оюунлаг Монголын төлөөх үйлс бүхэн дэлгэрэх ерөөл дэвшүүлье.

НИТХ-ЫН ТӨЛӨӨЛӨГЧ, СОНГИНОХАЙРХАН ДҮҮРГИЙН ЗАСАГ ДАРГА Н.АЛТАНШАГАЙ