АНУ-ын Нью-Йорк хотноо зохион байгуулагдаж буй “Хувьсаж буй боловсрол” дээд хэмжээний чуулга уулзалтын үеэр дэлхийн улс орнууд боловсролын салбарын хэд хэдэн асуудлыг хөндөн ярилцлаа.

Цаашид боловсрол хэрхэн өөрчлөгдөж байгаа талаар Боловсрол, шинжлэх ухааны сайд Л.Энх-Амгалан байр сууриа илэрхийллээ. 

Тэрээр:

1. Сургууль гэдэг ойлголтыг юу гэж ойлгох вэ. Сургуульд явуулж буй үйл ажиллагаа, сургуулиас мэдлэг олж авах, мэдлэгээ түгээх энэ арга хэмжээг хэрхэн зохион байгуулах вэ. Хичээлийг танхимын болон цахим хосолсон хэлбэрээр явуулах зайлшгүй шаардлага байгаа талаар дэлхийн улс орнууд зөвлөлдөө. 
2. Багшийн хөгжлийн асуудал. Дэлхий нийтээр багшийн дутагдалтай байна. Багшийн боловсролд гүйцэтгэж буй үүрэг шинэчлэгдэж, багш хүүхэд бүрийн сурах өвөрмөц хэрэгцээ, хөгжил, арга зүйг дэмжсэн шинэ хандлагууд бий болно.
3. Хичээлийн хөтөлбөрийн асуудал. 21 дүгээр зууны иргэдийг ямар мэдлэг, ур чадвар, төлөвшлөөр сургах ёстой вэ гэдэгт анхаарч байна. 
4.  Боловсролын цахим шилжилт, санхүүжилтийн асуудал. Боловсролд зарцуулж буй 1 долларыг хэрхэн үр өгөөжтэй, хүртээмжтэй, чанартай боловсрол олгоход зарцуулах вэ гэдэг талаар улс орнууд туршлагаа хуваалцлаа.

Дэлхий нийт хүртээмжтэй боловсрол гэхээсээ илүүтэй чанартай боловсролыг яаж хүүхэд бүрд хүргэх вэ гэдэг том сорилтын өмнө тулгараад байна.